Meclîsê Cinîyan ê HDPyî do taxan de cinîyan dir bêrê têhet 

2020-06-22 13:48:44


	 

	WAN - Wan de çarçewaya kampanyaya ‘Têkoşînê cinîyan her ca de yo’ do taxan de bi cinîyan dir bêrê têhet, derheqê babeta şîdetê dewlet-camêrd, hêrişê cinsî yê hemverê domanan, sererastkerdişê înfazî û tayînkerdişê qeyûman de munaqeşe bêrê kerdene.

	 

	Meclîsê Cinîyan ê Partîya Demokratîkî ya Şaran (HDP), vera hêrişanê hemverê destkewtişê cinîyan û şîdetê camêrdan ê Tirkîya û herême de zêde bîyo, kampanyaya ‘Têkoşînê cinîyan her ca de yo’ da destpêkerdene. Hemsereka HDPyî Wanî Oznur Bartine derheqê xebatanê ke bajaran de do bêrê kerdene zanayîş da.

	 

	Oznure da zanayene ke sererastkerdişê înfazî yê Heyetê Pêroyî yê Meclîsî ra derbaz bîyo, fehmê îqtîdarî ramojneno û wina vat: “Bi nê sererastkerdişê yew hedefê ewil oyo ke vernîya hêrişê cinsî yê hemverê domanan abikerê. Qanûnêko têduştî dûr vejîyayîne meydan. Verê nê ma vînenê ke kiştişê cinîyan zêde bîyo. Heqê cinîyan yeno xespkerdene, siyasetmedarê cinî yenê destbendkerdene. No teqez nêzdîbîyayîşê  polîtîk o. Cinî do têkoşînê xo dewam bikerê.”

	 

	Oznure bale ante serê hedefgirewtişê cinîyan û vat: “Cinî her wareyî de vernî de yê. Cinî coka hedef de yê. Bi tayînkerdişê qeyûman destkewteyê cinîyan hedef girewtî. Hemverê Komeleya Cinîyan a Rosa sereştiş ame kerdene. Îdarekar û endamî ameyî tepiştene. Komeleya Rosa prosesê pandemî de zî kuçeyan de têkoşîn da. Wedartişê posterê Gulîstan Doku û perskerdişê aqûbetê ci zî bi babeta sucî. Cinîyêka ciwane babeta vatişî ya. Derheqê gumanbaran de tu zanayîş çin o. Pêwa vengdayîşê keye, partîyê sîyasî, cinîyan tu çîyêk nîno kerdene. Seke Gulîstan Dokuye xeylêk cinî wina yenê vindîkerdene, Qetilkerdene. Aqûbetê înan nîno perskerdene. Ma do seba her wext kuçeyan de bê.”

	 

	Oznure tewr peyîn qiseykerdiş de îzahat da ke çarçewaya kampanyaya ‘têkoşînê cinîyan her ca de yo’ plansazîyêk mengêke yo vejîyayo û wina vat: “Ma do taxan de bi cinîyan dir bêrê têhet. Ma do derheqê qanûnê înfazî de cinîyan xeberdar bikerê, ma do verê cinîyê ke rastê şîdetî ameyê bê. Vera qanûnê înfazî, talankerdişê xoza, îstîsmarê cinî û domanan bi cinîyan dir bêrê têhet.”