Feleknas Uca: Yewîya Neteweyî hemverê hêrişan de bêveng a 

2020-06-18 14:18:24


	 

	WAN - Parlamentera HDPyî ya Êlihî Feleknas Uca, hêrişê vera Mexmûr, Şengal û Qendîl û Biradostî ercna û vat: "Cinîyê ke îradeyê xo teslîmê DAIŞî nêkerdî, ewro vera faşîzmê AKP-MHPyî sere nêtewênê û fek herra xo ra vera nêdê."

	 

	Teyareyê Şerî yê Arteşê Tirkî 15ê hezîrane saete 00.00 de Wargehê Mexmûr, Şengal, Qendîl û Biradostî bomba kerdî. Hêrişê hemdem 40 deqeyî dewam kerdî. Parlamentera Partîya Demokratîkî ya Şaran (HDP) ya Êlihî Feleknas Uca, hêrişê Tirkîya ercna û da zanayene ke hêrişî hemverê destkewtişê kurdan o û va: "Kardî resaya este. Eke ma bibê yew do hêriş zî vinderê. Roj roja yewîye ya."

	 

	'Yewîya Neteweyî vera hêrişan bêveng a' 

	 

	Feleknase dîyar kerde ke hêrişê Tirkîya yê vera kurdan her ca de dewam kenê û va, pêwa nê prosesê vîrûsî ambargoyo ke Îdarekarê Herêma Federalê Kurdistanî hemverê Mexmûrî keno û hema zî dewam keno û wina va: "Nêverdenê ke hetkarîya tibî zî seba Mexmûrî bêrê kerdene. Mexmûr cayêko girîng o. Rayîrê tifaqê kurdan Mexmûr ra derbaz beno û xeta sûrî yê şarê Kurdî yo. Ambargoyê hemverê Mexmûrî, hemverê heme şarê Kurdî yo. Kampa Mexmûrî de 12 hezar kes maneno û binê kontrolê Neteweyê Yewbîyayî de ya la çi heyf, hêrişê DAIŞî hemverê Mexmûrî de zî bêveng bi û nika zî ambargo esto, sivîlî yenê qetilkerdene la reyna bêveng a. Nê hêrişê vera Mexmûrî merdim nêeşkeno qebul bikero."

	 

	'Oyo ke DAIŞî nêkerdo wazenê bikerê'

	 

	Feleknase dewam de wina va: "2014 de hemverê Şengalî qirkerdiş kerdî. Şengalî bê pawitiş verdayî. Bi hezaran cinî kewtî destê çeteyanê DAIŞî, bazaran de ameyî rotiş. Hema zî aqûbetê 300 hezar Êzidîyan nîno zanayene. Pêwa heme hêrişan fek herra xo ra vera nêdayî û hema zî çadiran de ciwîyenê. La çadirê înan zî yenê bombavarankerdene. Dewleta Tirkî bi bombevarankerdişê Mexmûr û Şengalî, gelo kamî rê xizmet keno? Çîyê ke DAIŞî 2014 de nêkerdo, wazenê nika bikerê. Cinîyê ke îradeyê xo teslîmê DAIŞî nêkerdî, do sereyê xo hemverê AKPyî zî nêtewênê û fek herra xo ra vera nêdê. Bi bombevarankerdiş dir wazenê îradeyê şarî çin bikerê. Nê hêrişî vindertişêko sîyasî yê. Konseptêko topyekun o."

	 

	'Babete bîyayîşê Kurdan o'

	 

	Feleknase persa ‘Gelo çi karê Tirkîya Mexmûr, Şengal, Efrîn, Serêkanî de esto?' pers kerde û bale ante serê hêrişê hemverê partîya înan û rayrayîşê demokrasî û wina vat: "Babete Şengal, Efrîn û Mexmûr ra vejîyaya. Babete babeta nasnameyê kurdan a, bîyayîşê kurdan a, kurd û Kurdistanî ya. Nê hêrişê nînê qebûlkerdene, kardî resaya este. No ne reyke yo ne di rey o, her roje hêriş kenê."

	 

	'Roj roja yewbîyayîşî ya'

	 

	Feleknase, hemverê hêrişê Mexmûr, Şengal, Qendîl û Biradostî veng da Kurdistana Federal û hikûmetê Iraqî û wina vat: "Problemî bi bombevarankerdişê şarî û domanan nînê çareserkerdene. Bi diyalogan yenê çareserkerdene. Roj roja yewbîyayîşî ya. Roj roja serewedaritîşî ya. Eke ma bibayîne yew, ewro dewleta Tirkî wina cesaret nêkerdêne.