'Do çend rojê bîn baxçe wişk bibo' 

2020-06-16 15:59:14


	 

	MÊRDÎN - Dimayê Dêrik û Qoserî, nika zî dewa Nisêbînî hetê DEDAŞî ra ceyran ame birnayene. Welatîyan reaksîyon vera rewşe dayî û vatî: "Rojêke bîn zî awe û ceyran nêro do baxçe wişk bibo."

	 

	Sazgehê DEDAŞî bi sebebê ke deynî nêameyê dayene, ceyranê nêzdîyê 40 dewê girêdayê Qoser û Dêrikî yê Mêrdînî birna bi û no problem hema zî dewam keno. Dewijî nêzdîyê mengêke yo bê awe û ceyran ê û nika zî Nisêbînî awe û ceyran ameyê birnayene. Di roj verê (12ê Hezîrane) dewa Zorava de ceyran ame birnayene. Welatîyan dîyar kerdî ke do birnayîşê awe baxçeyê înan wişk bibê.

	 

	'Ma her serre nê mexdurîyetî ciwîyenê'

	 

	Fatma Elnamure da zanayîş ke ekîbê DEDAŞî bi cendermeyan dir ameyê dewe û ceyran û awe birnay û vat: "Seba ke ceyran çin o, awe zî çin a. Ma her serre nê mexduriyetî ciwîyenê. Bebekê ma estê. Seba ke keye germ o, ma serê siba heta şan de binê daran de ronişnenê. Bi di rojî yo ma nêeşkenê baxçe awe bidê. Ma rojêk bîn zî awe nêdê do sebze û darî wişk bê. Yenê vanê deynî estê û ceyranê bîrê awe birnenê. O zî qîm nêkeno, ceyranê keyeyî birnenê. Nika zî werdê ma yê dolabe xira bî."

	 

	'Deynê ke vanê kes nêeşkeno bido'

	 

	Hasîna Kuta ke eynî dewe de ciwîyena û wina vat: "Ne ceyran esto û ne zî awe. Vanê deyn esto. La ma keyeyan zî biroşê, ma nêeşkenê nê deynî bidê. Seba erd û geniman wina deyn nusnenê ke. Nika zî ameyî ceyranê bîran birnayî, yê keyeyan birnayî. Ma çi bikerê zî ma nêeşkenê nê deynan bidê. Ma do nê germî de bieşkê wina biciwîyê gelo?  Ma nêeşkenê keyeyê xo de werdêke viraznê, ne zî eşkê roşê."

	 

	Hasîna veng da ke ganî çareyêk bêro vînayene.