'Ganî şar wayîrê cenazeyanê xo vejîyo' 

2020-06-14 14:08:10


	 

	AMED - Reaksîyonê hemverê texrîpkerdişê goristanan dewam kenê. Îdarekara MEBYA-DERî Yildiz Damla, dîyar kerde ke ganî şarê Kurdî wayîrê cenazeyanê xo vejîyê. Îdarekara MEBYA-DERî Helîme Topuze zî da zanayene ke ganî bêvengîye bêro şiknayene.

	 

	Reaksîyon û nêrazîbîyayîşê hemverê texrîpkerdişê goristanê Wan, Mûş, Êlih, Colemêrg, Çewlîg, Amed û Şirnexî de dewam keno. Îdarekarê Komeleya Kultur û Yewîya Paştdayîşî û Hetkarîya bi Merdimanê Xo Jêderka Medenîyetî Vindî Kerdê (MEBYA-DER) Yildiz Damla û Helîme Topuze hêrişê hemverê goristanan şermezar kerdî û vengdayîşê wayîr vejîyayîşê goristanan kerdî. 

	 

	'Nêeşkenê hêzê keyeyan bişiknê'

	 

	Yildize derheqê babete de wina va: "Bi bombayan hêrişê goristanê Sîsê û goristanê bînan kerdî. Ma nê hêrişan şermezar kenê. Kesê ke nê wehşetî kenê, xo ra vanê ma musluman ê. Dîn de çîyêk winasî çin o. Wa pêro keye û rîspî wirzê serê lingan û bêrê têhet. Wa verê nê wehşetî vajê ma qebul nêkenê. Mêrdîn de senîn cenazeyêka bi wesayît rê girêdanê û keye keye persenê ke şima cenaze nas kenê yan nê. Amancê înan hêrişê psîkolojîk o. Wazenê erc û hêzê keyeyan bişiknê. La çiqas hewil bidê zî ganî do nêeşkê serkewte bibê. Semedo ke keyeyê ma bi hêz o, hêzê keyeyê ma nîno şiknayene."

	 

	'Wayîrê cenazeyanê xo vejîyê'

	 

	Yildize tewr peyîn veng da keyeyan û wina va: "Ganî şar, wayîrê dewaya xo vejîyo. Dişmin bi her tewir kişeno, qetil keno, îşkence keno. Hem dayîk û hem zî domanan zî kişenê. Seba ke dişminêko bi xidar o. Dewleta tirkî hêrişê her çar parçeyê Kurdistanî kena. Omidê mi oyo ke wa kurdî êdî hemverê nê hêrişan sere wedarnê û wayîrê cenaze û goristananê xo vejîyê."

	 

	'Ganî bêvengî bêro şiknayene'

	 

	Helîme zî qiseykerdişê xo de bale ante serê şiknayişê goristanan û wina va: "Ez waya hîrê şehîdan a. Gama ke goristanê Sisê ame viraştene, hem seba mi û hem zî seba keyeyê mi xeylêk manayîn bi. La nika hêrişê ke yenê kerdene nînê qebûlkerdene. Hem qanûnan de çîyêk winasî çin o û hem zî dînê Îslamî de çîyêk winasî çin o. Tu cayêk de wehşetêk winasî çin o. Kam ci dewlete hêrişê goristanan kena û esteyê cenazeyan goristanan ra vejena? Şima çira dewaya esteyan kenê, şima esteyanê ma ra çi wazenê? A Dayîka Xalîse ke esteyê lajê aye dayî destê ci dej kewt ganê ma. Ê keyeyî do senîn bi rehetî boye bigîrê. Ganî bêvengî bêro şiknayene.