
Semedê cinîyanê Qerejdaxijan cuye şefeqî de dest pêkena  

2020-06-14 13:59:21


	&nbsp;

	Medya Uren

	&nbsp;

	AMED - Cinîyê ke dewa dorê koyê Qerejdaxî de ciwîyenê, şefeqî dir wirzenê, vernê de benê bêrîvan û pesê xo ancenê û dima ra zî benê citkar mîyanê zîyanê xo de citkarî kenê. Şan de zî keyeyê xo pak kenê, werd hadre kenê û domanan dir eleqedar benê. No çî her roje bi eynî rewşe dewam keno...

	&nbsp;

	Herêma Qerejdaxî cayêko bi bereket o. Tîya de pesdewarî û ramitiş yeno kerdene. Tewr zêde birinç, nîske, genim, cew, niha, petêx û zebeş tîya yenê ramitene. Bi ameyîşê wisarî dir û hamnanî dir, dewijî seferber benê û şefeqî ra wirzenê, heta ereyê şanî xebityenê. Bi taybetî zî cinî.

	&nbsp;

	Ma nika serrê herra Qerejdaxî de yê. Her dewêke tewr zêde bi 20 keyeyan yena meydan û pîya mîyanê têkilîyêko xurt de ciwîyenê. Goreyê vatişê înan, heme merdimê yewbînanê û nêzdîyê yewbînanê. Dinya de yew cayêko yewin rey ramitiş ameyo kerdene, nê deştê bi bereket ê. Coka do herre û merdimî qet taybetmendîyê xo vindî nêkerê.

	&nbsp;

	Ciwîyayîş bi şefeqî dir dest pêkeno

	&nbsp;

	Dimayê çend dewan, ma serê sibayî resayî dewa Heştexî. Ma hetê bêrîvanê ke kerîyê pesî ancenê ameyî pêşwazîkerdene. Ma waşt ma derheqê xebate û cuya înan de zanayîş bigîrê. Sere de Neslîhan Yildize ma rê qalî kerde û va ke tîya şefeqî de wirzenê û wina va: "Tîya bar serê milê cinîyan de xeylêk zêde yo. Eke şima zî temaşe bikerê, şima bixo zehmetîyan bivînê. Goreyê mi çîyê ke ma keê, tu camêrd nêeşkeno bikero. Bi ayabîyayîşî dir ma dest bi kar kenê, ma pakitîyê derûdorî kenê û werd viraznenê. Dima zî ma karê xo yê pesdewarî kenê. Ge-ge ma benê bêrîvan, ge-ge ma vanê şivan zî." Seke Neslîhane zî va, tîya merdim vîneno ke heme kar serê milê cinîyan de yo.

	&nbsp;

	Bi herre dir geş benê

	&nbsp;

	Wexto ke karê bêrîvantî tîya qedêno, verê xo danê bostanan û tîya zî ramitiş kenê. Bi tiraktor ma verê xo danê zîyanê Pelşîna Yildize. Pelşîne, zîyanê xo de nîsk ramitim. Pelşîne zî wina qalê xebate xo kerd: "Karê ma de çîyo tewr bi zor zî xebata verê tîjî ya. Cinî, bi herre dir bendêke qayîm awan kerdê. Çiqas zor û zehmet bo zî ma bi kêfêke pîl karê xo kenê, sewbîna kêfê mi beyeran rê zî yeno. Dewa ma heta nika tena 2 keyeyan verê xo da metrepolan."

	&nbsp;

	'Êyê ke rew wirzenê zî û êyê ke erey rakonê zî cinî yê'

	&nbsp;

	Serê na herre de xeylê ramitiş yeno kerdene û wina va: "Na herême de tewr zêde ramitişê birinç, nîske, genim, cew, niha, petêx û zebeş yeno kerdene. Ewro zî seba komkerdişê nîske ma ameyî. Ma pey tirektore citê vaşî ke ameyo tirakerdene kom kenê. Dimayê komkerdişî mabêne 2 rojan de do patoze bêro, nîske û vaş pîya cîya kenê. Nîske ke ameya komkerdene ma roşenê û vaşê ke ma weçînayî seke êm ma heywanan rê darenê we. Dimayê ke karê ma tîya qedîya, na rey zî ma verê xo danê keye û dest bi karê keyeyî kenê. Amadekerdişê şamî û rakewtişî kenê. Coka êyê ke tewr lez aya benê û êyê ke erey rakewenê zî cinî yê."

	&nbsp;