Rêxistinê kede: Ganî fek tayînkerdişê qeyûman ra vera bidê 

2020-06-03 09:43:57


	 

	Rengîn Azîzoglu

	 

	AMED - Temsîlkarê sendîkayan reaksîyon vera tayînkerdene qeyûman dayî û vatî: "Ganî ma şaşî ra ageyrê. Ma wazenê îradeyê şarî, wezîfeyê xo reyna bigîrê. Ma do semedê demokratîkbîyayîşê welatî, hewldayîşê xo dewam bikerê."

	 

	Partîya Demokratîkî ya Şaran (HDP) weçînayîşê 31ê Adara 2019 de 3 ci ra şaredarîyê şaristanê girdan, 5 merkez, 45 qeza û 12 bîn, bi pêroyî 65 şaredarî qezenc kerdî. La bi qerarê wezaretê karê zereyî dir, semedê 45 şaredarîyanê HDPyijan qeyûm ame tayînkerdene û hemşaredarî wezîfere ameyî girewtene. Reaksîyonê vera qeyûman zî dewam kenê.

	 

	'Ma do rojê tarîyan pey xo de verdê'

	 

	Endama Yewîyaa Odaya Mîmar û Muhendisê Tirkan (TMMOB) ya Amedî Arîn Zumrute, dîyar kerde ke xeylêk qeyûmî weçînayîş de bî namzed la nêameyî weçînayîş û va: "Nê zî da werte ke şar vera qeyûman çi fikrîyeno. dimayê weçînayîşê şaredarî ra dima semedê 45 şaredarîyan qeyûm ame tayînkerdene. Tewr peyîn 15ê Gulane de semedê şaredarîyan qeyûm ame tayînkerdene. Weçînayîş semedê vetişê îradeyê şarî yenê kerdene. La dima ra qeyûm tayîn kenê. No zî girîngîyê weçînayîşî çin keno. No zî bêrêzdarîyêko hemverê şarî yo. Mumkin nîyo ke kesê ke demokrasî ra bawer kenê, qeyûman qebul bikerê. Qeyûm hêrişê hemverê tercîhê şarî yo."

	 

	'Polîtîkayê bêvengkerdişî yenê kerdene'

	 

	Arîne dewam de wina va: "Hukmat vera ke enerjîyê xo vera semedê weşîye xerc bikero, polîtîkayê bêvengkerdişî hemverê muxalîfan keno. Tayînkerdişê qeyûman zî  parçeyêk nînan ra yo. Mesajêko ameyo dayene xeylêk zelal o. La ma bi hêzo ke ma rêxistinbîyayîşî ra dûrî fîneno, do rojê tarî peyê xo de verdo."

	 

	'Ganî nê şaşî ra ageyrê'

	 

	Hemsereka TUM BEL SENî ya Amedî Nîhal Yanike zî wina dîyar kerde: "Semedê tayînkerdişî meşrû bikerê zî kedkaran îdarekarîyê herêmî ra îxrac kerdî û kar ra eştî. Embazê ma yê ke şaredarîyan bê tehqîqat, bi hewayêko vera ehlaqî û wijdanî kar ra ameyî eştene. Ganî nê şaşîye ra ageyrê. Ganî îradeyê şarî ageyrê serê wezîfeyê xo."

	 

	'Heqê xizmetê şarî ameyo xespkerdene'

	 

	Hemsereka Karê Awanîya ê Sendîkayê DÎSK-Genel Îşî Nebîle Irmak Çetîne zî arde ziwan ke cayo ke edelet û huqûq çinbo, îradeyê şarî çin yeno hesibnayene û va: "Teda û tepiştişî hemverê parlamenter, hemşaredar û endamê meclîsê xespkerdişê heqan o. Bi nê caardişî dir zî heqê xizmetê şarî ameyo xespkerdene.”