Arêyo 155 serre destê cinîyan de gane maneno 

2020-05-28 12:16:23


	 

	Zeynep Turgut

	 

	COLEMÊRG - Dewa Biyadirî ya girêdayê qezaya Çelê, arêyo awe ke 155 serrî yo bi xeyrê kede û berardişê cinîyan heta roja ma ya ewro ameyo. Cinîyê ke arê de xebityenê, dîyar kerdî ke amancê înan oyo ke ê heta se serrê bînan arê gane verdê.

	 

	Dewa Biyadirî ya girêdayê qezaya Çelê ya Colemêrgî, arêyo awe de cinî bi tehnayîşê kunciyan, berardişê tahîne kenê û bi no hewayî, arêyo seserra heta roja ma ya ewro ardê. Arê ke 155 serrî yo bi hewayêko çalak, hetê cinîyan ra yeno xebitnayene, eynî wextî de hemverê teknolojî zî xo ver dano. Welatîyê dewe, arê de hem tahîne û hem zî genimê xo tehnenê. Tahîna ke arê kanî de yena tehnayene, semedê rotişî xeylêk şaristananê vakurê Kurdistanî û Tirkîya ra yenê erşawitene. Kuncîyê ke rojêke awe de yenê verdene, dima ra makîne de yenê tehnayene û firina kolîyan de yenê sûrkerdene. Tewr peyîn zî arê de yenê tehnayene.

	 

	‘Cinî ganekerdişê arê tarîxî de rolêko girîng kay kenê’

	 

	Zeyneb Demîra ke bi serran o arê de xebate kena dîyar kerde ke bi keda cinîyan, arê ameyo heta na roje û vat: “Ma tîya xebatêka hempar kenê. Cinî û camêrdî qasê yewbînan xebitênê. La bêşik seke karê bînan, tîya de zî başê ke cinî xebate kenê cîyayê. Êyê ke camêrdî xebitîyenê, ge ge cîya benê. Nimûne; cîyakerdiş û pakkerdişê kuncîyan cinî kenê, la sûrkerdiş camêrdî kenê. Arê ma bi awe xebityeno. Bi serran o ke no arê xebityeno. Ma payîze ra heta wisarî berardiş kenê û bihar ra heta payîze zî berardişê ardanî kenê. Tahîna ke tîya yena viraştene bi name û veng a. Ma her cayê Tirkîya û Kurdistanî rê erşawenê. Cinî, ganekerdişê arê de rolêko girîng kay kenê. Heta ke ez bibî ez o destûr nêdî ke no adeto tarîxî vindî bibo. Heta nika çew ma rê hetkarî nêkerd û paştdayîş nêda ma, ma bi hewledayîşê xo û keda xo heta na roje ard û ma do heta peynî bîyarê.”

	 

	‘Ma arê de hem berardiş kenê û hem zî benê wesîle ke no kultur qetî vindî nêbo’

	 

	Emîne Ozcana ke 20 serrî yo arê de xebityena, arde ziwan ke ê xeylêk aciz benê û arde ziwan ke arê tarîxî bi ked û berardişê cinîyan gane yo û wina vat: “Herra ma zaf bi bereket a. Her çî tîya virazîyeno. Fasulyan ra bigî, heta nîske her çî virazêno. Ma xeyrê înan debara xo kenê. Eke herêma Çelê esas biameyne girewtene, do berardişê bi hêz tîya bivejîyayîne. Labelê no ca, terkê qedere ci kerdê. Welatîyê hereme bi îmkananê xo çînenê û roşenê. Bi serran o ke ez nê arê de xebityena. Belê, rast o ma zaf aciz benê la gama ke merdim tarîx peyser ra bîyaro ameyox, merdim zaf kêfweş beno. Ma wazenê ke bêro vînayene ke verê ra merdimî çiqas jîyatî bîyê û bê teknolojî çiqas awankerdox bîyê. Ma amanc kenê ke arê heta seserran gane bimano. Ma arê de hem berardiş kenê û hem zî benê wesîle ke no kultur qetî vindî nêbo.”