Hepsîyê zîndanê Rîzeyî: Ma êdî nêeşkenê boya xo bidê 

2020-05-28 11:17:26


	 

	MÊRDÎN - Hepsîyo bi nameyê Necdet Terlakî ke zîndanê Tîpê L yê Rîze de maneno, dayîka ci Nure Terlake dîyar kerde ke lajê aye telefon de dîyar kerdo ke semedê tedayê zîndanî, êdî nêeşkenê boya xo bigîrê û vat: “Ma çend waştişname da. Ma çend rey zîndanan ard rojeve. La pêwa nê tedayî kêm nêbenê.”

	 

	Zîndananê Tirkîya û Kurdistanî de pêwa vîrusê koronayî, îhlalkerdişê heqan dewam kenê. Her wext erzenê setê koguşan û cigêrayîşan kenê, danê hepsîyan ro, îşkence kenê, yenê surgunkerdene, heqê weşîya înan yeno astengkerdene, dermankerdişê bi kelepçe, cigêrayîşo viran û sewbîna... Nê zîndanan ra yew zî zîndanê Tîpê L yê Rîze yo. Hepsî, bi hetkarîya keyeyanê xo veng danê û dîyar kenê ke semedê tedayan êdî nêeşkenê boye bigîrê.

	 

	‘Hepsîyê edlî her wext înan rê heqaretan kenê’

	 

	Nure Terlake dîyar kerde ke lajê aye Necdet Terlak, 21 serrî yo hepsî yo û pêvînayîşê telefonî de vengdayîşê hîsgêrîyê raya pêroyî kerdo û vat, lajê mi telefon de vatişê seke, ‘Beno ke reyke bîn destûr nêdê ke ma vejîyê pêvînayîşê telefonî zî’ ardo ziwan. Nure dîyar kerde ke semedê vîrusî bi hîrê mengî yo ma nêeşkenê şorê pêvînayîş û wina vat: “Semedo ke Rîze dûrî ya, ma nêeşkenê her wext şorê. Bi 3 mengî yo ma bi telefon zanayîş ci ra gênê. Lajê mi çiqas geyreno wano, ‘nêverdenê ma boya xo bigîrê.’ Sewbîna hepsîyê edlî heqaretan hepsîyê sîyasîyan kenê. Roja ke lajê mi şîyo uca ma her çî dî. Her roje çîyêko newe yeno ciwîyene.”

	 

	‘Gardîyanî roje ra 3-4 rey yenê koguşan’

	 

	Nure dîyar kerde ke hepsîyê sîyasî û edlîyan eynî wextî de vejenê pêvînayîşê telefonî û no zî rayîrê rewşa provakatîf akeno û wina vat: “Ge-ge hepsîyê sîyasî û edlî pîya vejenê pêvînayîş. Hepsîyê bi edlî bi zanebîyayîş veng vejenê ke hepsîyê sîyasî nêeşkê qisey bikerê. Pêwa ke lajê mi bi desan rey nê çî îdarekarî ra vato zî înan çîyêk nêkerd. Verê koguşî bi kamerayan ameyne temaşekerdene. Nika gardîyanî roje de 3-4 rey şonê koguşan. Seba vîrusî hacetanê pakitî zî nêdanê. Ma xeylêk rey waştişname nuşt. Ma şî ÎHD la averşîyayîşêk nêvirazîya. Bi mengan o nê tedayî dewam kenê. Uca de îşkence tutanê ma rê kenê. Wa fek teda û îşkenceyanê xo vera bidê.”