Kooperatîfê Cinîyan ê Licê bi warê îstîhdamî yê cinîyan 

2020-05-26 13:12:20


	 

	Şehrîban Aslan

	 

	AMED - Cinîyê licêyîjî yê kedkarê keyeyan ameyî pêser û înan ''Kooperatîfê Cinîyan ê Licê'' na ro. Kooperatîf hem cinîyan îstîhdam keno û hem zî seba paştdayîşê cinîyan beno mîsalêk.

	 

	Qezaya Licê ya Amedî de êlula 2019î de 5 cinîyê kedkarê keyeyan ameyî têhet û înan “Kooperatîfê Cinîyan ê Licê'' na ro. Kooperatîf nika xeylêk cinîyan îstîhdam keno. Cinîyan kooperatîf de reya verêne dest pê viraştişê rîçal, tirşî, salçe kerd. Cinîyan dima zî verê xo da tekstîl û berhemanê şitî. Cinîyî nika teberê welatî ra zî sîparîşan gênê.

	 

	Kedkaranê kooperatîfî ra Nesrîne Bahar îfade kerd ke ê hem xebitîyenê hem zî keye de mesuldarîya xo anê ca û ê eşkenê sey cinîyan heqê her çî ra berê.

	 

	‘Ma lazimîyanê xo Licê û dewanê dormeyê ci ra peyda kenî’

	 

	Sereka Kooperatîfê Cinîyan ê Licê Bedrîye Dolak zî vat: “Kooperatîf hetê cinîyan ra ame awankerdene, la hetê xebatî de ma cinî û camêrd pîya xebetîyenî. Ma hetê îstihdamkerdişî de serede cinîyan tercih kenî. Ma xebatanê kooperatîfî bi sewzîyanê huşkan û tirş, reçel û qorme da dest pêkerdene. Ma pîyazanê şînan ramit û pazaran de rot. Ma lazimîyanê xo Licê û dewanê dormeyê ci ra peyda kenî. Ma goreyê demî berardiş kenî.”

	 

	‘Ma nika pendîr virazenê’

	 

	Bedrîye qiseykerdişê xo yê peyênan de bale ante azadîya cinîyan ya ekonomîke ser o û wina qedênaye: “Ma hetê tekstîlî de bi viraştişê çenteyan dest bi berarişî kerd. Ma çante û kincan zî virazenê û teberê welatî ra sîparîşan gênê. Ma nika pendîr virazenê. Ma her roje dewanê cîyayan ra qasê 300 lître şit danê arê. Ma do bimojnê ke cinîyî senî serkewte yê. Ma pê nê kooperatîfî armanc kenê ke seba cinîyan warê îstîhdamî abikerê û cinîyî azadîya ekonomîke ya xo bivisnê destî.”