‘Ma domananê xo nêkenê qurbanê qanûnanê AKPyî’ 

2020-05-25 15:21:39


	 

	EDENE - Endama Platformê Cinîyan ya Edeneyî Pelîn Çîçeke, dîyar kerd ke qanûnê efûkerdişê tecawizkerdoxan nîno qebûlkerdene û va: “Wazenê bi rayîrê zewicnayîşî, tecawizkerdoxan efû bikerê. La ma rayîrê nêdenê ke domanî bibê qurbanê qanûnanê AKPyî."

	 

	Qanûnê înfazî ke hetê AKP û MHPyî ameyo amadekerdene, meclîsî de amebi tesdîqkerdene û yeno waştene ke madeyêko bîn ke efûkerdişê tecawizkerdoxan bi ca ano meclîsî de bêro qebûlkerdene. Eke no qanûn bêro qebûlkerdne, domanî do bi tecawizkerdoxanê xo dir bêrê zewicnayene. No qanûn, hetê rêxistinê cinîyan ra rastê reaksîyonî ame. Endama Platformê Cinîyan ê Edeneyî Pelîn Çîçeke bale ante serê qanûnî û şîroveyê xo ma dir pare kerd.

	 

	‘Pêameyîşê qanûnî do zirarêko pîl bido komelî’

	 

	Pelîne va, AKPyî bi polîtîkayê xo yê peyser hêrişê tevgerê cinîyan û va: “Ma bi têkoşînê cinîyan dir rayîr akenê. Hukmat hetê ekonomîye û sîyasetî de vindî kerd. Gama ke vindî keno zî cinîyan hedef gêno. Nika qanûnê înfazî prosesêko hende xesas ano rojeve. Rêxistinê cinîyan baş zanê ke no qanûn bêro qebûlkerdene do zirarêko pîl bido komelî.”

	 

	‘Seba reaksîyonan nêame meclîsî’

	 

	Pelîne, qiseykerdişê xo wina dewam kerde: “Vatî ke hêrişkar do nêrê efûkerdişî labelê TCAKî de şîdetê hemverê cinîyan nêameyo binamekerdene. Kesê hêrişkarî, kiştox û tecawizkerdoxî nika kuçeyan de geyrenê. Eynî wextî bi tu hawayî zî nê prosesî de cinî nêameyê pawitiş. Wextê qanûnî înfazî ame qebulkerdene, waştêne qanûnê zewicnayîşê domanan 14 serrî zî bidê qebûlkerdene. La seba reaksîyonan nêame rojeva meclîsî." 

	 

	‘Ma domanan nêkenê qurban’

	 

	Pelîne, tewr peyîn wina va: “Tirkîya de weqfan, bi nameyê kursê Quranî û keyeyê weykerdişê domanan de bi hêrişê cinsî dir rî bi rî mendî. Welatê ma de hema problemê zewicnayîşê domanan werte ra nêwişto û bi nê qanûnî zî tewr zêde domanî mexdûr bibê. Ma nêverdenê ke domanî bibê qurbanê qanûnê AKPyî yê ke hêrişê cinsî yê. Ma nê zîhnîyetî qebul nêkenê.”