Cinî lazimîyê xo yê zimistanî 

2020-05-23 14:07:40


	 

	Medya Uren

	 

	AMED - Dewa Panemêrga ya qezaya Mîksî cinî serê sibayî ra wirzenê û seba pincarî verê xo danê zozanan. Cinîyê ke seba pincaro baş rayîrêko derg ra şinê û xo resnenê cayê tewr berz ê zozanan, dimayê komkerdişî seba amadekarîya zimistanî nê vaşan kom kenê.

	 

	Serê menga Gulane de hêdî hêdî zozanan ra vewre kêm bena û vaş beno zergûn. Nê dir cinî, dest bi komkerdiş pincar û amedekarîyê zimistanî kenê. No zî cografyaya Kurdistanî de seke kulturêko yo. Nê wextan de cinî verê ke roj vejîyo, kewenê serê rayîrê dûrî û xoza ko kenê. Cinîyê dewa Panemêrga ya qezaya Mîksê ya Wanî, seba komkerdişê pincarî ver bi zozanan de şonê. Dimayê komkerdişî zî ê seba peynîr û werdê amadekarî kenê. Nahîde Akbaşliya ke hem bêrîvanî kena û hem zî pincaran kom kena dîyar kerde ke no mewsîm seba înan mewsîmo tewr weş o.

	 

	‘Ma şefeqê serê sibayî de kewenê rayîr’

	  

	Nahîde Akbaşli dîyar kerde ke her wext nê wextî de pincar kom kenê û va: “Ma şefeqê serê sibayî de kewenê rayîr, ge-ge ma bi rayrayîş û ge-ge zî ma bi heywanan şonê cayê tewr berz yê zozanan, seba ke ma pincaranê tewr weşan kom bikerê. Çiqas rayşîyayîşê ci zehmet bo zî reyna zî weş o. Ma musayê ke eke ma nêşêrê nê wareyan, ma xo de kêmîyêk vînenê. Boye û hawayê koyan, komkerdişê vaşî merdimî gane keno. Xora dewan de tewr weş karê ma yo. Gama ke ma karê xo kenê, ma bi coş kenê.”

	 

	‘Vaşê nê zozanan derman o’

	 

	Nahîde dewam de wina qalî kerde: “Xeylêk tewirê vaşanê seke; mendik, kînger, siyabo, bizar û buke ma kom kenê. Nê seke dermanê xoza zî yenê werdene. Coka zaf bi qîmet ê. Ma seba amadekarîya zimistanî, wisar ra dest pêkenê. Ewro zî ma pincar kom kerd. Dimayê rayîrêko dûr, ma cinî bi xebatêka hempar nişnenê ro û pincarê ke ma kom kerdê pak kenê. Ma înan kenê bîdonan û dima ra seba penîrî danê kîşte. Xora dewa ma û Wan de peynîro bi vaş xeylêk meşûr o. Ma hem bêrîvanîye kenê û hem zî vaş kom kenê. Wexto ke ma peynîrê xo viraşt zî ma kenê binê erdî. Payîz û zimistanî ma vejenê û wenê. Ma xeylêk reyan zî peynîrê xo roşenê. Vaş û penîrê ma seke nîşaneyêko zozananê ma yo. Qendê nê zozanan weş virazîyenê.”