‘Roşanê Remezanî bi kêfweşîya domanan weş beno’  

2020-05-23 13:22:32


	 

	Rojda Seyidxan

	 

	QAMIŞLO - Cinîyê şaristanê Dêrikî seba amadekarîya Roşanê Remezanî mîyanê tevgerê bazarî de qalî kerdî û wina vatî: “Pêwa ke lazimîyê roşanî vayê û ma rewşanê zehmetan ra derbaz benê, ma do roşanê xo seke her sere pîroz bikerê. Bi omidê ke pêro serrê ma kêfweş bê.”

	 

	Roşanê Remezanî yew roşanêko komelê muslumanan o. Her serre peynîya menga remezanî de 3 rojî Roşanê Remezanî yeno pîrozkerdene. Roşanê Remezanî de keye û merdimî pîya kom benê û roşanê xo pîya pîroz kenê. Kêfweşîya domanan zî cîya ya. Domanî mîyanê kuçeyan de geyrenê û şekiran kom kenê. Emsar zî pêwa vaybîyayîşê lazimîyê roşanî û vilabîyayîşê Vîrûsê Koronayî ra şar wazeno ke reyna zî kêfweşîya xo biciwîyo û roşanê xo pîya pîroz bikero. Derheqê babete de cinîyanê şaristanê Dêrikî amadekarîyê xo yê seba roşanî ma dir pare kerdî.

	 

	‘Pêwa pêro zehmetîyan ma roşanê xo pîroz kenê’

	 

	Cinîya bi nameyê Sebah Elîye, ameyîşê roşanê Remezanî pîroz kerde û wina va: “Verê çend serran, Roşanê Remezanî zaf weş derbaz bîne. Verê roşanî bi 15 rojan ma amadekarîya xo kerdêne, la her serre vuryeno. Pêwa zehmetîyan ke ma ci ra derbaz benê, ma roşanê xo pîroz kenê. Ma û keyeyê ma, merdimê ma kom benê û roşanê yewbînan pîroz kenê. Ma bi hêvîya roşanêko weş ê seba merdiman ê.”

	 

	‘Destpêk de ma roşanê pakrewananê azadîye pîroz kenê’

	  

	Cinîya bi nameyê Silamet Mihemede serê pîrozbayîyê roşanî de wina vana: “Ma kulturê xo yê pîrozkerdişê roşanê Remezanî xo vîr ra nêkerdo. 3 rojan roşan yeno pîrozkerdene. Ma şekiran seba domanan gênê û vila kenê. Roşanê Remezanî bi kêfweşîya domanan weş beno. Ma û cîranê xo pîya kom benê û çoregan viraznenê. Saetanê serê sibayî de ma vernê de şênê serê goranê pakrewananê azadîye û roşanê înan pîroz kenê. Dima ra zî ma keyeyî dir kom benê û pîya rojêka weş derbaz kenê.”

	 

	‘Bi omidê heme serrê ma bi roşanê ke omid awan kenê kêfweş bê’ 

	 

	Cinîya bi nameyê Dîlber Mihemede derheqê roşanî de wina va: “Emsar çî zaf vay ê, pêwa nê zî ma do roşanê xo seke her serre pîroz bikerê, heta ke kêfê domanan bêro. Domanî bi ameyîşê roşanî dir zaf kêfweş benê û ma zî bi kêfweşîya înan şa benê. Bi omidê heme serrê ma ke roşan awan kenê derbaz bê.”