Pîran de cinîyan dest bi ronayîşê şitilê sewzîyan kerdî 

2020-05-22 13:33:05


	 

	Şehrîban Aslan

	 

	AMED - Dewa Pêrxakya ya Pîranî de cinîyan dest bi ronayîşê şitilê sewzîyan kerdî. Cinîya bi nameyê Mukades Yaline daye zanayene ke aye kêfweşîya ronayîşê şitilan cuyena.

	 

	Dewa Pêrxakya ya Pîranî ya Amedî de cinîyan dest bi ronayîşê şitilê sewzîyan kerdî. Cinîya bi nameyê Mukades Yaline kedêk zêde daya baxçeyê xo û dîyar kerde ke ê do hamnanê xo bi nê sewzîyan derbaz bikerî û amadekarîya zimistanî zî bikerî.

	 

	Mukaddese qiseykerdişê xo de wina va: “Mi baxçeyê xo de firingî, balcan, xiyar, bamya, rihan, pîyaz û naneyan rona. Emserrr wisar erê ame Amedî. Timî varan estbî. Mi sere de toxum eşt. Dima ra zî mi şitilan rona. Ma hewteyo şî şitilanê xo rona erd.”

	 

	‘Ma lazimîya sewzîyan tîya ra temîn kenî’

	 

	Mukaddese dewamê qiseykerdişê xo de dîyar kerde ke cuya bajarî zehmet a û badê Vîrusê Korona cuye hîna zehmetin bîye û wina dewam kerde: “Sewzî xeylê vaye yî. Êdî ma nêeşkenî sewzî biherînî. Coka ma qerar da ke sewzîyan bironî. Ma lazimîya sewzîyan tîya ra temîn kenî. Ma amadekarîya zimistanî zî kenî.”

	 

	‘Yê tewr muhîm pawitişê xozayî yo’

	 

	Mukaddese tewr peyn, ard ziwan ke verê cû dewe de cuyayêne la nika dewran bedilîyayo û wina qedênaye: “Ma ewilî qiymetê dewe nêzanayêne. Ma baş nêewnyêne xozayî ro. Nika herkes bajaran ra herîkêno dewan. Eke ma zirar nêdanayêne xoza do na nêweşîya nêvirazîyayêne. Ganî ma tîya rap ê zirar nêdî xoza. Yê tewr muhîm pawitişê xozayî yo.”