'Ma nêwazenî eynî dejan reyna biciwîyê' 

2020-05-19 15:12:50


	 

	ENQERE - Fatma Nezîrîya ke dimayê hêrişê bombayê Talîbanan birîndar bî û seba dermankerdene mecbûr mendî ke koçê Tirkîya bikerê, Enqere de zî şahidîyê hêrişê bomba kena. Fatma dîyar kerde ke Tirkîya de cinîyê multecî di rey zehmetî ancenê û va, cografya cîya bê zî, rêça şerî serê cinîyan de ya.

	 

	Fatma Nezîrîya ke multecîya Afganij a û seba rewşa welatê xo mecbûr manena ke koçê Tirkîya bikera û Enqere de bi ca benê. Fatma, Kabîl de Mudûrîyê Îdareyê Weçînayîşê de memûr bî 2014 de 11 rojî weçînayîş rê mendib, hêrişê bombayê Talîbanan de birîndar bî. Fatma ke bi giranî birîndar bena, welatê xo de îmkanê dermankerdişî nêvînena, koçê Tirkîya kena. Bi 4 serrî yo Enqere de ciwîyenê. Fatma bi xeylêk cinîyanê Afganijan dir Komeleya Cîhan Mala de sabunan viraznena.

	 

	Fatma û xeylêk cinî komele de xebityenê. Cin sabûn û mertalanê pawitişî viraznenê. Fatma yew nê cinîyan ra ya û derheqê hîkayeya xo de qalî kerde.

	 

	'9 gule gina bedenê mi ro'

	 

	Fatma derheqê babete de wina va: "Ez sazgeh de xebityayîne. Kafîleyêke turîstan ê 5-6 kesî bî ameybî. Na mebêne de endamêko Talîbanijan bombaya gane bi xo teqna. Her ca wêran bi. Mi xo kerd mîyanê dolabe. Dima ra însanî ver bi ofîsê ma ameyî. Endamê Talîbanijan dî ke ez dolabe de ya. Bi çekan hêrişê ma kerd. 9 gule gina bedenê mi ro. Her cayê mi perçe bi. Çeng û heme didanê mi şikyabî. Dermankerdişê mi uca mumkin nêbi. coka ameya Tirkîya.

	 

	'Rojêka ameya enqere hêrişê bomba ame kerdene'

	 

	Fatma dîyar kerde ke roja ke ameya Tirkîya zî bîya şahidê hêrişê bomba û va: "Ma va, ma xo xelas kerdo labelê a roje hêriş ame meydan. Sewbîna darbeyê 15ê Temmuze ame ciwîyene, qetî nêkena xo vîr ra. Ma êdî nêeşkayîne ageyrê welatê xo. Mi pêro pereyê xo da dermankerdiş. Domanê mi tîya şî mektebe. Zehmetî antî. Ez û mêrdeyê xo ma xebityayî. Ma garsonî kerd. Karê bînan kerd. Mi nexş û derznayene kerd. Mi pakîtî kerd. Dimayê ke vîrus dest pêkerd, Komeleya Cîhan Mala, ma rê destek da û ma tîya mertalê pawitişî viraznenê."

	 

	'Cinîyê multecî di rey mexdûr benê'

	 

	Fatma, bale ante serê zor û zehmetîyanê multecîyan û va: "4 serrî yo tîya ya. Ma zaf zehmetî ant. domana min a tewr qije şit waştêne, mi nêzanayîne ma şêrê ça ra bigîrê. dima ra domanê ma Tîrkî hêdî hêdî mûsayî. Ziwan û kulturê ma yewbînan ra cîya bi. Cinî di rey zor û zehmetî ancenê. Tirkîya de seba ke ma ziwan nêzanayîne, ma xeylêk ameyî xepinayîş. Reyke pasaportê ma destê ma ra ameyî girewtene. Ez veng dana pêro Tirkan. Ma zî însan ê, dinya keyeyê ma pêrûne ya. Ezîyet bi ma mekerê. Ma xeylêk problemî ciwîyayî. Ma êdî nêşkenê dej biancê. Êdî ma qebûl bikerê."