Şîdetê polîsan rojanê pandemîyî de zêde bi  

2020-05-12 13:30:21


	 

	MÊRDÎN - Şîdetê polîsan rojanê pandemîye de zêdeyêr bi. Bi taybetî serê herêma Nisêbînê Mêrdînî de. Medyaya komelî de zî ma rast ameyî ke polîsan çek vera da domanê ke qijî û eynî wextî de zî waştî domanêko 18 serre bitepişnê.

	 

	Dimayê bi lez vilabîyayîşê şubeyê Koronoyî (COVİD-19)  qedexeyê tebervejîyayîşê kuçeyan ame îlankerdene. Polîsê ke prosesê pandemîyî de berpirsîyarê asayîşê şarî yê, serê domanan û pîlan de şîdet bi ca anê. Rojê vîyarte de, taxa Firatî ya qezaya Nisêbînî girêdayê şaristanê Mêrdînî de domano bi nameyê B.E yo ke hewşeyê awanî de kay kerdênd, hetê polîsan ra rastê şîdetî ame. Polîsan çek vera da domanan. Dima ra zî domanêko 18 serre şîyo teber, tope birayê xo yê qijî bigîro, rastê şîdetê polîsan ame. Polîsan waşt ey bi zor bi tepişnê.

	 

	Qezaya Nisêbînî de hem psîkolojîk û şîdeto fîzîkî esto

	 

	Domano bi nameyê B.E oyo ke 24ê Nîsane de bi embazanê xo dir mîyanê baxçeyê TOKÎ yê taxa Firatî de qezaya Mêrdînî Nisêbîn de kay kerdêne, rastê hêrişê polîsan ame. B.E hetê polîsan ra yeno gulavarankerdene û wazenê bi zor bikerê erebe. Coka nê hedîseyê winasî xeylêk yenê ciwîyene. Serê şarî de hem bi psîkolojîk û hem zî fîzîkî şîdet kenê. Rojanê vîyarte de domanêko 5 serre wexto ke balkone de tope kay keno, tope ci gênena erd. Birayê ey O.Y ke 18 serre yo seba tope bigîro şino teber. Nê ser o xeylêk polîs şinê keye û wazenê bi zor O.Y bitepişnê. 

	 

	‘Seba topêke waştî tornê mi bitepişnê’

	 

	Pîrika domanan a bi nameyê B.Y ke bîya şahidê hedîse nê vatişan pare kerde: “Tornê min o 5 serre da topa xo ro û dima ra zî waşt şêro tebera bîyaro. Tornê min o 18 serre zî seba ke o nêvejîyo, bi lez şi topa ey tebera girewt. Dimayê ke ame keye, polîsan bi hêz dayî berê ma ro. Vatêne, ‘ma polîs ê, ber akerê.’ Mi ber akerd. Hema mi nêpersa vatî, vende ey ciwanî bikerê, wa bêro tîya. Mi venda tornê xo û pers kerd ke se bîyo? Verê ke cewab bidê, tornê mi kaş kerdî û waştî berê verê panzêre. Mi vat, heqê ke şima wina çin o. No nêzdîbîyayîşêko kêfî yo. La înan berdişê ey de israr kerdî. Heta ke cîran û keyeyî verê berî de kom bî. O wext tornê mi bermayîne, la înan qet goşê xo nêda nê vengan. Bi kombîyayîşê girseyî dir înan fek kaşkerdişê tornê mi ra veradayî û şî. Eke ez tena bibîyayîne, bê suc û bê sebeb înan tornê mi berdêne. Tornê mi mîyanê 2 deqeyan de şo tope tebera ard û ame. Înan seba nê wazenê hem psîkolojîk û hem zî fîzîkî şîdet serê ma de bikerê.”