Komeleya Cinîyan ê Starî pêwa vîrusî wareyan de xebityena 2020-05-11 15:56:09   WAN - Komeleya Cinîyan ê Starî ya Wanî, cinîyê ke rastê şîdetî yenê muracat kenê, nê prosesî de zî pêwa vîrusî, wareyê bi cinîyan dir yenê têhet.   Dimayê vîrusê koronayî şîdetê serê cinîyan zêde bi. Eynî wextî de dimayê qanûnê înfazî yê Tirkîya zî gumanbarê şîdetî ameyî tehlîyekerdene û AKPyî vera nê adresêko seba cinîya nêmojna ra.   Cinîyê ke nê prosesî de barê înan giran bi, vera şîdetê fîzîkî, psîkolojîk û ekonomî zî torranê paştdayîşî û têkoşînî mûnenê.   ‘Tedbîr nêameyî girewtene û mehkûmê keyeyî kerdî’   Komeleya Cinîyan ê Starî ke bi serran a Wan de vera şîdetê serê cinîyan de têkoşîn kena, prosesê pandemî de zî xebatan dewam kena. Endama Komeleye Meryema Aslane ard ziwan ke prosesê pandemî de mexdurîyetê cinîyan di qatî zêde bîyo û vat: “Dayeyî zêdebîyayîşê şîdetê serê cinîyan vanê. Heqê cinîyan heqo sereyîn o. Gama ke no esas yeno girewtene, gerek heme tesîrê ke vernîya ciwîyayîşî gêno, xo bipawê. Rojanê karantîna de vera ke tedbîr bêrê girewtene, camêrdê ke şîdet kerdî serbest ameyî veradayene. Nê caardişî reyna cinîyan mahkumê keyeyî kerd.”     ‘Hema hema pêro keyan de şîdet yeno ciwîyene’    Meryema da zanayene ke tabloyê şîdetê serê cinîyan heme dinya de zêde bîyo û vat: “Goreyê çapemenîye heta nika di tenî bi guman 3 cinî cuya xo vindî kerdê. La ma nêzanê ke şîdet her keye de yeno ciwîyene. Eynî wextî de keda cinîyan zî vejîya di kat. Sazgehê cinîyan û platformê cinîyan bi torranê cîya paştdayîş dayî. Çapemenîya komelî na babete de girîng a. Ganî her sazgeh, çapemenîya komelî de vindertişê xo yê vera şîdetî bîyarê ziwan. Ganî torranê paşydayîşê vila bikerî.”   ‘Ma tedbîran gênê û xo resnenê cinîyan’   Meryema tewr peyîn qalîkerdişê xo de wina vat: “Xeylêk cinî nêeşkenê xo biresnê komeleya ma. Coka ma vejîyenê wareyan. Herême de cinî îmkanê înan xo biresnê çin o. Ma pêwa heme şertî û mercan kewenê wareyan û xo resnenê cinîyan. Seba ke ma cinîyan ra vajê, ‘şima tena nîyê’ ma kewenê wareyan.”