KCD: Tu qetlîam nêeşkeno vernîya hêzê azadî û xoverdayîşê şarî de vindero 

2020-05-04 15:27:25


	 

	AMED - KCDyî ke bi wesîleya serrgêra Terteleyê Dêrsimî eşkerayîyêke daye qûrbanê terteleyî yad kerdî û semedê yewbîyîyayîşî û xurtkerdişê têkoşînî veng da û vat: "Tu qetlîam nêeşkeno hêzê azadî û xoverdayîşê şarî vindarno. Qetlîam bi taybetî semedê komelê Elewîyan trajedîyêko pîl bo zî Dêrsim, her daîm bo rûmetê şatê Kurdî."

	 

	Kongreya Komelê Demokratîkî (KCD) bi wesîleya serrgêra terteleyê Dêrsimî de eşkerayîye da. KCDyî vat: "Bi wesîleyê serrgera qetlîamê Dersimî, seke KCDyî vengdayîşê ma raya pêroyî rê no yo; No qetlîamo ke vera komelê Elewîyê Kurdan ame kerdene, heçverê heme merdimayî ame kerdene. Seba kerdoxê nê qetlîamî eşkera bibê, bêrê ma nê arşîvênê qetlîamî abikerê û pîya vengê xo berz bikerê. Dersim de sucê merdimayî ame kerddne. Heta ke arşîvê roja qetlîamî bêrê akerdene û cayê goristanan bêro dîyarkerdene ma bêveng nêmanenê.

	 

	Dewamê eşkerayîye de wina ame vatene:

	 

	''Terteleyê Dêrsimî merheleyanê polîtîkayê qirkerdiş û asîmîlasyonî ke awanbîyayena netewe dewlete ra dima destpê kerdî ra merheleya en kovane ya. Terteleyê Dêrsimî despêkê komare ra dima game bi game ame plankerdene. Heme raporî ke ê wextan de ameybî hedrekerdene de nê çîyî ravêrtêne; Dêrsim roje bi roje hêna zêde beno Kurd û naye ser o kî zaf rayan pêşnîyazê operasyonî ameybî kerdene. Wexto ke nameyê Dêrsimî sey Tuncelî ame vurnayene dima ra bextê ey kewt destê Mufettîşîya Umûmî ya taybet û rejîmo faşîst û zordar. Dima ra kî nabênê serranê 1937-1938î de sirgûn û qetlîamî destpê kerdî.

	 

	Ma sey Kongreya Komelo Demokratîk, des hezaran merdimanê xo yê Elewî yê birûmet ke Terteleyê Dêrsimî de canê xo vînî kerdî bi hûrmet anîme xo vîrî û ma qirkerdiş bi hêrsêko pîl lanet kenîme. Sey her wextî qetlîamê Dêrsimî de zî cinî derd û kulo en pîl ciwîyayî. Seba naye zî gere en zêde cinî hesabê qetlîamî bipersî. Tu hêzê qetlîaman çîn o ke vernîya şarê ke seba azadî û rûmetê xo, xo ver danî bigîro. Her çiqas no qetlîam trajedîya komelê ma yê Kurdanê Elewîyan bo kî Dêrsim her tim bîyo rûmetê pêroyê şarê Kurdî.

	 

	Ma sey Kongreya Komelo Demokratîk vengdayîşo Terteleyê Dêrsimî heme şarê xo ra wîna kenîme. Qetlîamo ke komelê ma yê Kurdanê Elewîyan ser o bîyo pêroyê şarê Kurdî rê bîyo. Şarê Kurdî, heta ke bi Elewî, Sunnî û Êzdîyanê xo, dej û kêfweşîyê xo nêkero yew o do nê qetlîaman ra nêxeleso. Aye ra seba ke ma qetlîam, koç, xizanî û asîmîlasyonî ra bixelesîme gere ma yewîya xo ya netewîye bivirazîme. Şarê ma vera heme qetlîaman de roja sey ewroyîne de heme zemînan ser o micadeleyê xo ramneno. Seba şarê Kurdî tu çîyêk do sey verî nêbo. Gere şarê ma heme cayan de bi nê rûmetî têwbigêro û wayîrê tarîxê xo bivejîyo.”