Zozanê Feraşînî de wextê kengeran 

2020-05-02 14:58:45


	 

	WAN - Cinîyê Botanijî pêwa cuya bajarî dir têkilîyê xo bi xoza dir dewam kenê û zozananê berz yê Feraşînî de kengeran kom kenê.

	 

	Fehmê xebitnayene û şaristanî zirarêko pîl dano xoza, bi vîrusê koronayî dir zî bi hawayêko eşkera vejîya meydan. La hema zî bi hezaran cinîyê bi xozayî dir têkilî de yê estê. Cinîyê ke her çiqas dewan ra koçê şaristanan kerdibî zî, kulturê xo dewam kenê û bi menga wisarî dir vejîyenê zozanan û xeylêk nebatan kom kenp. Werdo ke zî nika zozanan de zergûn beno kenger o.

	 

	Xeylêk cinîyê ke Xaçortê Wanî de ciwîyenê û dewa Elkê ya Şirnexî ra koç kerdê yê. Cinîyê ke serran ê 90î de seba tedayê dewlete ra koç kerdê, nika şonê zozananê Feraşînî û kengeran kom kenê. Cinî kengeran bi hawayê cîya nimnenê û menganê zimistanî de xebitnenê. 

	Kengerî bi vilê xo yê moran, herêmanê koyan de yenê vînayene. Verê nê de xeylêk cayê cîya de benê zergûn û tewr zêde herême de yenê werdene.

	 

	‘Ma dewe ra nêvisenê’

	 

	Cinîya bi nameyê Naciye Abî, kengeran seke mujdanîya wisarî bi name kerde û wina vat: “Dewe de cuya ma bi nebatê xozayî dir derbaz bîne. Cuyêka ma xozayî bî. Dewe de cu zaf weş bî. Ma hema zî dewe ra nêbenê û bi ameyîşê wisarî dir ma şonê. Komkerdişê kengeran tay zehmet o. Ma bi kardî dir birnenê û anê keye. Semedo ke ma ci ra hez kenê, ma nê zehmetîyan nêvînenê.”

	 

	‘Hem weş û hem zî seba weşîye baş ê’

	 

	Bahar Abîye zî wina vat: “Karêko bi zehmet o. Kengerê ma kom kenê, ma zimistanî wenê. Ma pak kenê, awe de peşnenê, dima ra kenê poşetan û kenê dolabe. Ma dolabe de nimnenê. Ma kengeran hakan viraznenê. Şorba de xebitnenê. Hem tehmê înan weş o û hem zî seba weşîye baş o.