‘Ma do vera hêrişê vera goran muracatê huqûqî bikerê 

2020-05-01 14:38:46


	 

	WAN - Hemsereka MEBYA-Derî Gulîstan Onvere dîyar kerde ke vera hêrişê hemverê goran de do muracatê huqûqî bikerê û vat, do verê pêro keyeyan de ca bigîrê.

	 

	Xeylêk qezayê Wanî de goristanê kesê HGPyijan û YJA Starî ke tarîxê cîya de cuya xo vindî kerdibî, hetê leşkeran ra rastê texrîbatan ameybî û şîbî keyeyan ra zanayîşê nasnameyan girewtibî. Hemsereka Komeleya Kultur û Yewîya Paştdayîşê Hetkarîya Keyeyan Şaristan de Merdimê Xo Vindî kerdê (MEBYA-DER) ê Wanî Gulîstan Onvere derheqê babete de qisey kerde û vat, hêrişê vera goran, vera ercê şarê Kurdî yo û vat, bi seserran o polîtîkayê dewlete yê hemverê kurdan nêvuryeno.

	 

	‘Gelo hende merdimanê ma ra tersenê’

	 

	Gulîstane da zanayene ke hukmatê AKPyî bi amancê çinkerdişê erj  û tarîxê kurdan hêrişê goristanan kerdo û vat: “Goristanê ma, erjê ma yê. Heqê tu kesî çin o nê bikero. No suc o. Nê hêrişî nêeşkenê ma berê. Wa dest nêdê cenazeyanê domananê ma. Gelo hende merdanê ma ra tersenê?”

	 

	‘Peynîya hêrişan bîyarê’

	 

	Gulîstane da zanayene ke hukmatî prosesê vîrusî xo rê kerdo îmkan û vera kurdan hêrişî zêde kerdê û wina vat: “Wazenê kurdan qirkerdişî ra derbaz bikerê. Pêro dinya hemverê vîrusê korona têkoşîn keno, la Tirkîya bi kurdan dir eleqedar bena. Ganî wa nê caardişan ra fek vera bidê. Wa peynî bidê nê wehşetê xo yê vera keyeyan. Wa merdan rehet vera bidê. Wa ganê keyeyan zêde nêdejnê. No caardiş re tu wijdanî de ca nêgîno. Wa Dîyanet, îzahatê nê bikero. Gelo no kam ci ayet û sura de ca gêno.”

	 

	‘Ma do muracatê huqûqî bikerê’

	 

	Gulîstane tewr peyîn qalîkerdişê xo de vat ke do seke komela kişte keyeyan de bê û vat: “Keyeyî xo resnenê ma la seba vîrusî ma nêeşkenê vejîyê teber. Ma nêeşkenê şêrê verê keyeyan. No proses wijdanê ma nêrehet keno. Ma do serê esasê muracatî bi ÎHDyî dir bikerê. Tena keyeyê kurdan ney, kam beno wa bibo ma do verê înan de ca bigîrê.”