Arzu Çerkezoglu û xeylê karkerî ameyî destbendkerdene 

2020-05-01 14:03:59


	 

	STENBOL- Polîsan destûr nêda firazkerdişê sembolîk yê 1ê Gulane. Firazkerdişê sembolîkî yê Raşteyê Taksîmî de Sereka Pêroyî ya DÎSKî Arzu Çerkezoglu û xeylê kesê bînî ameyî binçimkerdene.

	 

	Rêxistinê ked û rêxistinê meslekî ewro do Raşteyê Taksîmî de 1ê Gulane firaz bikerdêne û saetanê şewe 21.00î de zî şibak û balkonanê keyeyanê xo ra do bi vetişê vengî û tafînayîşê çilayan 1ê Gulane firaz bikerdêne. Labelê polîsan awanîya Konfederasyonê Sendîkaya Karkeranê Şorişgêrî (DÎSK) girewt binê ablûqa.

	 

	Konfederasyonê Sendîkaya Karkeranê Şorişgêrî (DÎSK) da zanayene ke ê do saet 09.00î de seba vîrardişê kesêke Taksîm de cuya xo vindî kerdî do çeleg ronî verê Abideya Taksîmî. Labelê polîsan destûr nêda û Sereka Pêroyî ya DÎSKî Arzu Çerkezoglu û xeylê kesanê bînan binçim kerdî.

	 

	Arzuye ke ameye binçimkerdene serê hesabê xo yê medyaya komelkî de wina va: “Ma binê çiman de yî. Ewro her çar parçeyê Tirkîya de embazê ma xebetîyenî. Sîstemê Kamu nêrijîyeno labelê vanî ke ‘Firazkerdişê 1ê Gulane sîstem rijneno.’”