HDP: Ma do 1ê Gulane de qîrînayîşê xo bikerî yew 

2020-04-30 14:55:33


	 

	MERKEZÊ XEBERAN - Bi wesîleya 1ê Gulane Roja Karkeran de, Komîsyonê Kede ya HDPyî mesajêko eşrawit û vat: “Emsar 1ê Gulane de karker do tercîhê bikerê. Yan ma do vengê xo nêkerê zulm qebul bikerê, yan zî ma do zulmê sermayedaran red bikerê. Qîrînayîşê xo bikerê yew û pîya qîrînê xê berz bikerê.”

	 

	Hetkara Hemserekanê HDPyî ya Komîsyonê Kede ra Berpirsîyare Şazîye Kose bi wesîleya 1ê Gulane Roja Têkoşîn, Paştdayîş û Yewîye ya Mîyanneteweyîye ya Karkeran eşkerayîyêka nuştekîye weşanaye.

	 

	‘Wazenê sermayedaran krîz ra xelas bikerî’

	 

	Komîsyonê kede eşkerayîye de wina vat: “Ne Tirkîya de ne zî dinya de krîz rîyê janî ra nêvejîyo werte. Cara krîzêko giran ê ekonomîkî estbi û janî zî no krîz kerd giranêr. Hukmatan seba sermaye paketî ardî vernî vat 'destpêkê ekonomîyî' û bi nê hawayî weşîya şarî pey goş kerde.”

	 

	‘Ma 1 Gulane de her ca de yê’

	 

	Eşkerayîye de tedbîrê vera vîrusê Korona ameyî vîrvistene û ame vatene: ''Karker û kedkarî mîyanê lapanê mergî de mabênê vêşanîye û janî de vera dîyayî. Seba afernayîşê cuyêka newîye 1ê Gulane yê meserî ma her ca de yê. Ma keyeyan de, şûmşînan de, kuçeyan de, nêweşxaneyan de, kargehan de pê tilîlîyan têkoşîn pîl kenê, cuye vindarnenê û 1ê Gulane fîraz kenê.”