Abdullah Ocalan protokolê 1982î kerd vîrê KDPyî! 2020-04-29 16:26:22   RIHA - Rayberê PKKyî Abdullah Ocalanî qala alozîya Başûrî kerde û vat ke na polîtîkaya pê yewbînan kiştişê kurdan a. Abdullah Ocalanî eşkera kerd ke peymana ke serra 1982 Îdrîs Barzanîyî îmza kerde eşkîyena ke bêra newekerdene û vat, hewceyê kurdan pê yewîya neteweyîye esto.   Rayberê PKKyî Abdullah Ocalanî 21 serran ra dima reya verêne zîndan de pê telefonî keyeyê xo reyde qisey kerd.  Abdullah Ocalanî 27ê nîsane de birayê xo Mehmet Ocalanî reyde qasê 20-25 deqayan telefon de qisey kerd.    Goreyê Ajansê Mezopotamya Mehmet Ocalanî îfade kerd ke Ocalanî 3 babetan ser o rojdem ercna. Mehmet Ocalanî da zanayene ke Rayberê PKKyî Abdullah Ocalanî Protokolê 1982yî yo ke Herêma Kurdistanê Federalî îmza kerdbi vist vîrî û mesajê ”Hewceyê kurdan pê ro pê mi çin o, hewceyê kurdan pê haşitî û yewîye esto.”   21 serrî ra dima yewin qiseykerdene   Mehmet Ocalanî vat: “21 serrî yo ke heqo qanûnî yê telefonî nêno caardene. Ter peyên 27ê nîsane de saete 13.00 de reya verêne ma pêvînayîşê telefonî kerd. Rayber Apoyî vat ke wextê pêvînayîşî kilm o, seba ke rojdem biercno wext çin o û o do derheqê babeta sereke de qisey bikero. Serekî vat ke rewşa weşîye ya ey weş a. Ocalanî rewşa janî ser o nêvindert û rewşa kurdan ser o qisey kerd. Serekî awil serebûtê Kurdistanê Federeyî ercnayî. Mi Serekî rê vat ke mabênê Qendîl, PDK û YNKyî de meseleyê pîlî estê. Serekî derheqê serebûtanê Başûrê Kurdistanî de vat: ‘Na polîtîkaya pê kurdan kiştişê kurdan a. Na babete ra qezencê kurdan çin o. Ganî ne PDK ne zî YNK û ne zî têgêrayîşê kurdan nêkewê mîyanê hesabêkê winasênî ke ê do şer bikerê û vera naye zî dewletêke bidîyena înan. No nêno û nêro qebulkerdene. Ganî yewîya neteweyîye sey esas bêra girewtene. Ganî 40 serran ra nata yewîya kurdan bibîyêne. Meridmê ke uca de ciwîyenê kurd ê. Eke gonî birija kesêk nêeşkeno binê na gonîye ra bivejîyo. No mesajê mi hem seba Qendîl hem zî seba Hukmatê Herême yo. Reyna no mesajê mi seba keyeyê Barzanî, keyeyê Talabanî, şexsîyet û kesayetanê Başûrî yo. Hewceyê kurdan pê rijîyayîşê gonîye çin o. Hewceyê kurdan pê yewîye esto. Hewceyê kurdan pê haştîye û yewîye esto.’ Ez vana qey mesajo tewr girîng no bi.”   ‘Polîtîkayê kurdan bi kurdan bidê qirkerdene’   Mehmet Ocalanî ard ziwan ke Rayberê PKKyî Abdullah Ocalanî protokolê bi 10 madeyan o ke serra 1982î de hetê babîyê Nêçîrvan Barzanî Îdrîs Barzanîyî ra amebi îmzakerdene, vist vîrî û da zanayene ke goreyê protokolî ganîn hînî mabênê kurdan de gonî û şer nêrê çin bê.  Mehmet Ocalanî vat: “Hukmatê Başûrî, keyeyê Barzanîyî û YNKyo ke paştî dano hukmat û Celal Talabanîyî protokol qebul kerd. Nê keyeyan rê selam bibo. Serekî embazanê Qendîlî û keyeyanê Barzanî û Talabanî rê vat ke eke werte de kêmasîyêke esta ganî pê dîyalogan çareser biba. Serekî nê çîyî xî vatî: ‘Ganî hînî kurdî cayêk de pê bikerê û meseleyanê xo pê dîyalogan çareser bikerê. Kesê ke ganî naye bikerê keyeyê Barzanî, keyeyê Talabanî û Qendîl ê. Hem hêvîya şarê kurdî hem zî hêvîya ma na ya ke mabênê kurdan de gonîye nêrija.’”   ‘Hewceyê Kurdan bi yewîye esta’   Mehmet Ocalanî bale ant ser ke Rojawan rojdemê Ocalanî de yo û vat: “Serekî vat ‘Ez vînena ke rewşa Rojawanî ne hol a ne zî xirab a.’ Serekî vat ke partî û dezgehanê Rojawanî rêxistinbîyayîşo demokratîk pîl nêkerd, zaf qij mend. Na mesele zî heta ke hêzêk çinbo nêna çareserkerdene. Naye ra ganî rêxistinbîyayîş holêr bêro kerdene, çar parçeyan de bêro pîlkerdene ke çareserîye aver şora. Serekî wina dewam kerd: ‘Ma nêzdîbîyayîşê sey dikana mi biba wa qij biba qebul nêkenê. Dikana qije seba kurdan û şaran bes nîya. Na dikane dikanêka mezhebêkî yan zî neteweyêkî nîya. Partîya ma naye tewr qebul nêkena. Pê netewe û mezhebî rêxistinbîyayîş nêbeno. Seba yewîya demokratîke, şima partîye ser o averşîyayîşêk bikerê û naye pîl bikerê ke na seba şima do baş biba.”   ‘Her kes seba çareserî baş bixebityo’   Rayberê PKKyî Abdullah Ocalanî dewamê qiseykerdişê xo de nê çîyî vatî: “Goreyê texmînanê mi mîyanê nê hêzan de kesêk bi hawayêkê raştî nêewnîyeno mi. Dinya alem vînena ke ez 50 serrî yo ke se kena. Ez û embazê hetê mi hucreyanê xo de heta ke destê ma ra çi bêro ma kenê. Eke kesî raşt nêewnîyenê mi, ê mîyanê bêbextîye de yê. Her çi eşkera yo. Werte de meseleyêka pîle esta û ganî her kes seba çareserîye bi hawayêkê raştî bixebito. Werte de gonîya ke rijîyena esta, eke ti bieşkayêne bibî hêzêk ti verê na gonîye girewtêne.  Coka ganî her kes nê esasî ser o têkoşîn bikero û ganî vînayîşê înan wina bo.”   Zîndanan rê selamî   Mehmet Ocalanî peynîye de nê çîyî ardî ziwan: “Mesajê Serekî yê 3ê adare de çi estbî mesajê ye ê ney de zî ê estê. Kesê ke Serekî ra bawer kenê ganî nê mesajan bîyarê ca. Serek Apoyî tewr peyênî de embazanê tepişteyan û keyeyanê ke bedelî dayê rê selam erşawit. Reyna vat ke kesê ke mi persenî û goştarî kenê înan rê selamê mi vaje.”