'Wan de tedbîr baş nînê girewtene' 

2020-03-31 09:02:19


	 

	WAN - Cinîyan dîyar kerdî ke Wan de vera vîrusî tedbîrê baş nînê girewtene û qeyûm tena cayê merkezî dezenfekte keno û vatî: "Seba kesê ke hewcedarîyê înan estê, ganî xida û hacetê pakitî bêrê dayene."

	 

	Semedê vîrusê koronayî pêro dinya de vila bi, heta nika 30 hezar ra zêdeyêr kesî cuya xo vindî kerdî û Tirkîya de zî hûmara kesê ke cuya xo vindî kerd, resa 131. Hukmat hetê girewtişê tedbîran de vengdayîşê, 'keye de bê' kenê û seba debara şarî zî piştdayîşêkê înan çin o. Şarê Wanî ke sînorê Îranî de yê, dîyar kerdî ke ê bi endîşeyê û tedbîrê baş nînê girewtene û ganî hetê ekonomî de û hem zî hetê hîjyenî de hetkarî bêro dayene.

	 

	'Qeyûm çîyêkê nêkeno'

	 

	Beyan Aslane da zanayene ke tedbîrê hemverê vîrusê korona xeylêk qels ê û wina vat: "Qeyûm xêrcê taxê merkezî, taxê bînan de xebate nêkeno. Vanê ke wa kal û pîrî nêvejîyê teber. No zî tedbîrêko zaf pasîf o. Kal û pîrî keye de yê la ciwanî mecbûrê bixebitîyê. Ganî dewlete piştdayîşêkê bido şarî. Gerek hetkarîya xida û hacetê hîjyenî bido. Ganî fatureyê awe û ceyranî nêgîro, yan zî taloq bikero.”

	 

	'Taxê bînan de xebate çin a'

	 

	Sîbel Aslane zî reaksîyon hemverê rewşe de û vat: "Vera vîrusî tu tedbîr nînê girewtene. Însanî teber de yê. Gerek derheqê nêweşîye de zanayîş bêro dayene. Her kes cidî gêno la tedbîrî çi heyf cidî nîyê. Xebatê dezenfektanî bi sînor ê. Ganî tedbîrê hîra bêrê girewtene. Eynî wextî de gerek dewlete, piştdayîşê ekonomîye zî bida."

	 

	Zozan Aslane zî vat, Wan de tedbîrê baş nînê girewtene û vat: "Ganî seba xebatkaran heqdestê înan bêrê dayene. Ganî cuya merdiman verê çiman de bêra girewtene. Heto bîn ra vernîgirewtişê kar eştişî zî bêro girewtene. Şar perîşan bîyo. Gerek hacetê pakitî, xida, lepik û maske bêrê vilakerdene."