'Hedefê ma oyo ke ma hûmara endamanê cinîyan vejê 3 katî'

2020-03-28 14:24:20


	 

	WAN - Hemsereka SESî ya Wanî Fîgen Çolakogluye dîyar kerd ke wareyê sendîkal de potansîyelê cinîyan zêde bikerê û vat: "Cinî çarçewaya hêzê karê erjan de yenê ercnayene û keda înan nîna vînayene. Ma do zî nê ser o têkoşînê xo bikerê."

	 

	Şubeyê SESî yê Wanî, 23ê Sibate de şî kongre. Fîgen Çolakogluya ke bi KHKyî amîbî îxrackerdene û wextêk nêzdî de ageyrabî serê karê xo, sey hemserek ameye weçînayene.

	 

	Fîgene arde ziwan ke prosesê îxracê 27 mengan dewam kerdo û vat: "Caardişêko bêhuqûqî bi. Pêro embazê ma û merdimê ke kede dayê nê prosesê bêhuqûqî ra derbaz benê. Beno ke derg dewam bikero la ma do qetî serkewte bibê. Sloganê ma her wext, 'ma do serkewte bê, ma do qetî bi serkewtê bê' yo. Amancê ma oyo ke ma têkoşînê xo yê kede girs bikerê."

	 

	'Ma do têkoşînê xo dewam bikerê' 

	 

	Fîgene eynî wextî de da zanayene ke ê seke sendîka serê bêdadî û bêhuqûqî de vinderê û vat. "Têkoşînê ma do esasê demokrasî û têduştî de dewam bikero. hetê ekonomî de proses xetimyayo. Ma do bi embazanê xo dir têkoşînê xo dewam bikerê. Prosesê OHALî de surgun, îxrac ameyî kerdene. No zî sendîkabîyayîş de rayîr helnayîşê akerd. No polîtîka bi hawayêko resa amancê xo. Prosesê newe de hedefê ma oyo ke sendîkabîyayîş de potansîyelê cinîyan bêro zêdekerdene. Xeylêk wareyî de bi taybet wareyê sektorê cinîyan de hêzê kar ê cinîyan erjan yeno vînayene. Hûmara endamanê ma yê cinîyan serê 150yî de ya û hedefê ma oyo ke no vejîyo 3 katî. Bawerî û omidê ma na nuqta de esta."

	 

	'Ganî cinî hêzê xo bivîno'

	 

	Fîgene tewr peyîn qiseykerdişê xo de veng da cinîyan û vat: "Têkoşînê ma demderg o û rayîrê ma derg o. Ganî ma xo ver bidê. Tirkîya û dinya de xeylêk komele û sazgeh û dezgeyê cinîyan estê. Wextê ke bêro waştiş, eşkenê qerarê xurt bêrê girewtene û îqtîdarî bi zor bikerê. Ma bixo bawer bê. Ma serkewte bê do çîyêk ma asteng nêkero."