Keyeyê hepsîyan semedê Wezaretê Dade waştişname eşrawenê 

2020-03-25 15:28:41


	 

	AMED - Keyeyê hepsîyan semedê domanê xo yê ke bi tehdîdê vîrusî dir ameyê rî bi rî, seba serbest bêrê veradeyene do waştişname bierşawê dade rê.

	 

	Tirkîya de hûmara kesê ke semedê vîrusê korona cuya xo vindî kerdê resa 37ine û yê ke testê înan pozîtîf vejîyayo zî resayo 1529. Nê prosesî de îqazkerdişê keyeyê xo de bê, pakîtî rê baldar bê yenê kerdene. La zindanî wareyê tewr bi rîsk ê. Heta nika semedê zindanan tu gamêke merdiman tatmîn bikero nêame kerdene.

	 

	Keyeyê hepsîyan Zîndanê Tîpê D yê Amedî, semedo ke hepsî serbest bêrê veradayîş, waştişname eşrawitî. Endama Meclîsê Şaredarîya Şaristanê Gird ya Amedî Ronda Bate ke birayê ci zîndan de yo, endîşe û waştişê xo ard ziwan.

	 

	'Pakîtî çin a, werd baş nîyê' 

	 

	Rondaye vat ke panşeme pêvînayîş bi telefon dir kerdê û musayê ke derheqê vîrusî de tu tedbîr nêameyê girewtene û vat: "Hacetê pakîtî nêdayê. Dezenfekte nêkerdê. Awe zî bi sînor yena dayene. Awa germe zî zaf tay yena dayene. Semedê hepsîyan fêkî, sebze nînê dayene. Werdê nêbaş danê hepsîyan."

	 

	'Waştişê ma oyo ke têduştî bibo'

	 

	Rondaye arde ziwan ke dimayê ke bi pêvînayîşê telefonî keyeyê bînan dir zî kewtê têkilî û vat: "Ma keyeyî ameyî têhet, seba ke edlîye girewtebî ma nêeşkayîne şêrê dozgerîye. Dima ra ma qerarêko wina girewt. Ma waştişname amade kerd. Ma hewl da ke waştişname biresnê keyeyan. Ma waştişname resnenê her ca. Waştişê ma oyo ke her kes heqê weşîye bi hawayêko têdûşt bi ca bîyaro."