‘Şaredarîyê ke şaran pawenê reyna bîyî hedef’ 

2020-03-24 15:00:25


	 

	ÊLIH - Reaksîyon û nêrazîbîyayîşê rêxistinê sîyasî û sazgehê komelî hemverê tayînkerdişê qeyûman dewam kenê. Koordînasyonê Heskîfî, da zanayene ke hemşaredarê Êlihî vera projeyê Awbendê Ilisû û vera projeyê xoza talan kerdêne vejîyayîne û coka bî hedef.

	 

	Vizêr qeyûm tayînê şaredarîyê Êlîh, Farqîn, Licê, Gêl, Erxenî, Civanîka Sêrtî, Norşînê Bedlîsî û Xelfelîyê Idîrî ameyî kerdene. Nerazîbîyayîşê hemverê tayînkerdişê qeyûman dewam kenê. Rêxistinê sîyasî û komelî yê sivîl zî reaksîyon hemverê tayînkerdişê qeyûmî yê serê Şaredarîya Êlihî û tepiştişê hemşaradaran danê.

	 

	Koordînasyona Heskîfî vera tayînkerdişê qeyûman eşkerayîyêka nuşteyî dayî. Koordînasyonî neql kerd ke tayînkerdişê qeyûmî Şaredarîya Êlihî rasterast bi projeyê Awbendê Ilisûyî û projeyê HESî rê girêdayî yo. Koordînasyonî da zanayene ke seba vîrûsê koronayî dinya de xeylêk projeyê rijnayîşî bi hawayêko derbazdar ameyê vindarnayene û îktîdarê merkezî yê Tirkîya nê çî açernayî fersendî. 

	 

	Koordînasyonî da zanayene ke bi tayînkerdişê qeyûmê şaredarîyê Êlih, Farqîn, Licê, Erxenî, Gêl, Norşîn û bajarokê Xelfelî û Civanîkî îktîdar wazenê bikerê binê kontrolê xo û wina vat: “Hemşaredarê Êlihî yê ke nika destbendkerdeyê sere de vera projeyê Awbendê Ilisû û her tewir projeyê xoza talan kerdêne vejîyayîne û coka yewin zî bîyê hedef. Koordînasyonî da zanayene ke tayînkerdişê qeyûman ne huqûqî yo û qeyûm tayînî ser îradeyê şar û şaredarî wayîrê fehmê şarpawitox û şoreşgir kerdê. Nika reyna wazenê bi fehmê qeyûm îdare bikerî. Ma sey Koordînasyonî Heskîfî vanê ke wa ganî qerarê tayînkerdişê qeyûm peyser bêro girewtene.”