Merdimê hepsîyan ra vengdayîş: Ganî zindanî bêrê vengkerdene 

2020-03-22 13:43:54


	 

	WAN - Merdimê hepsîyan dîyar kerdî ke semedê vîrûsê korona zindanî binê tehîdî de yê û vatî hema ke erey nêbîyo ganî zindanî bêrê vengkerdene.

	 

	Tirkîya de semedê vîrûsê korona heta nika 9 kesî cuya xo vindî kerdî û testê 670 kesan zî poîzîtîf vejîya. Yew wareyê ke binê rîskê pîl de yê, zindanê Tirkîya de yê. Merdimê hepsîyan, rêxistinê heqê merdiman û sazgehê komelî yê sivîl, dîyar kerdî ke sere de hepsîyê nêweş, cinîyê bi domanî û hepsîyê ke emrê înan pîl bo bêrê tehlîyekerdene. La heta nika tu tedbîr nêameyo girewtene. Merdimê hepsîyê Wanijan dîyar kerdî ke ganî çareserîyêko bêro vînayene.

	 

	‘Zindanan de nînê dermankerdene’

	 

	Botan Tîmur 5 serrî yo zindanê Asayîşê Berzî yê Tîpê T yê Wanî de hepsî yo. Dayîka ci Aslihan Tîmure vat: “Lajê mi seba darbeyê ke girewtê, sereyê ci her wext dejeno. Zindan de nêameyne dermankerdene. Nika tehlukeyê vîrûsê korona esto. Ganî lajê mi û nêweşî bêrê veradayene.”  

	 

	‘Mîyanê çar dêsan de yê’

	 

	Aslihane hewteyo vîyarte şîbî zindan wina vat: “Ez hewteyo vîyarte şîya pêvînayîş. Zindanî pak nîyê. Mîyanê çar dêsan de yê. Ne herrî û ne zî roj esto. Nêweşîyêko tewr qij de eşkeno vila bibo. Koxuşê 8 kesî de 20 kes manenê. Ganî selahîyetdarê hukmatî bikewê mîyanê tevger. Îran de pêwa tedayê giranan hepsî serbest ameyî veradayene. Ganî tîya zî wina bibo. Ganî pêro keye vengê xo berz bikero.”

	 

	‘Domanê ma bi merdişî dir rî bi rî yê’

	 

	Behîce Abîye dîyar kerde ke lajê aye Samet Abî 21 serrî yo hepsîyo û nika zindanê Tîpê F yê Wanî de yo û wina vat: “Lajê mi zindan de bi nêweşîya gurçikan kewt. Seba nê boya ci çikyena. ket. Qet nêbo nê prosesî de serbest bêro veradayene. Ez zaf bi endîşeya. Ganî serbest bêro veradayene. Verê çimanê ma de domananê ma terkê mergî kenê. Hema ke erey nêbîyo gerek zindanî bêrê vengkerdene.”

	 

	‘Mengêka yo ez zanayîş ci ra nêgîna’

	 

	Hevîdar Erdeme zî dîyar kerde ke mêrdeyê aye Selahattîn Erdem 10 serrî yo hepsîyo û vat: “Ez Çelê yê Colemêrgî de ciwîyena. Mêrdeyê mi surgunê xeylêk zindanan kerdî. Cezaya muebetî ci rê ame birnayene. Tewr peyîn zindanê Tîpê T yê Manîsayî de bi embazanê xo dir îşkence dir rî bi rî mend. Coka cezaya neqlkerdene dayê bi mengêka yo ma zanayîş ci ra nêgînê. Bi nê vîrûsî dir endîşeyê ma hîna zêde bî. Ganî heme hepsî serbest bêrê veradeyene.