Cinî Newroze bi waştişê aştî û azadîye pêşwazî kenê 

2020-03-14 13:23:48


	 

	WAN/AMED - Pîrozbayîyê Newroze semedê weşîya şarî ame betalkerdene la cinî reyna bi kelecanêk pîl pêşwazî kenê. Semedê cinîyan Newroze omid, aştî û xoverdayîş a.

	 

	Vîrusê Korona ke hetê Rêxistinê Weşîye ya Dinya (WHO) ra sey pandemî ame îlankerdene û roj bi roj vila beno û Tirkîya de zî ame vînayene û dimayê nê çalakî û bernameyê girsî semedê weşîye şarî ameyî betalkerdene. Newroza ke her serre Tirkîya de hetê mîlyonan ra ameyne pîrozkerdene, seba nê sebebî ame betalkerdene. Her çiqas bêra betalkerdene zî Wan û Amed de cinî bi kelecan Newroze pawenê.

	 

	Azîme Tuncere da zanayene ke Newroze omid û kelecan awan keno û wina vat: “Newroze roşanê şarê Kurdî ya. Omidê ma oyo ke hepsîyê sîyasî bêrê veradayene. Waştişê mi oyo ke reng, ziwan û nasnameyê ma bêro qebûlkerdene. Ez aştî û azadîye wazena.”

	 

	‘Newroze serewedaritiş a’

	 

	Kumru Işike zî arde ziwan ke Newroze înan rê yena manaya serewedaritiş û xoverfayîşî û wina vat: “Ma her serre bi cil û belgê adetî şîne wareyan. Emsar pîrozbayîyê girseyî çinbi zî çîyêk semedê ma nêvuryeno. Ma aştî, azadî û têduştî wazenê.”

	 

	‘Ganî peynîya tedayan bîyarê’

	 

	Xezêm Koçake da zanayene ke Newroze semedê Kurdan yena manaya wayîrvejîyayîşê ziwan, kultur û vat ganî peynîye tedayê serê şarê Kurd bêrê.

	Heznî Aslane zî da zanayene ke Newroze semedê şarê Kurd girîng a û Aygul Ararate zî Newroze sey azadî bi name kerd.

	 

	‘Ma fek azadîya xo ra vera nêdanê’

	 

	Amed ra Fîgen Arase zî mîtîngê 8ê Adare şîrove kerde û vat: “Ma bi mîtîngê ke bi coş derbaz bîne 21ê Adare yo. Pêwa heme astengîyan ma do fek azadîya xo ra vera nêdê û qêrînayîşê xo yê semedê azadîye bi heme dinya bidê eşnawitiş.”

	 

	‘Newroze semedê ma girîng a’

	 

	Hatîce Esmere zî vat, Newroze semedê înan girîng a û sere de cinîyan rê û pêro şarî rê pîroz kerd.

	 

	Arzu Burakmake zî wina vat: “Ma cinî gerek wayîrê rojê taybet vejîyê. Ez 1993 ra heta nika şahidê tedayê ke Newrozan de yenê ciwîyayîş kena. Gule serê ma de ameyne rijnayene. Bi xêrê têkoşînî ewro bi mîlyonan wareyî de yê. Coka Newroze semedê mi roja xoverdayîş û pîroz a.”

	 

	Gulan Kaya zî bale ante serê girîngîyê Newroze ya semedê şarê Kurd û vat, a roje de azadî û aştîye vejîyena vernê û ganî merdim kulturê xo bidê dewamkerdene û omidê xo vindî nêkerê.