Ebru Gunaye: Serdemê ke bêro de planê ma yê derheqê tecrîdî de estê 

2020-03-13 16:17:59


	 

	ENQERE - Verfeka HDPyî Ebru Gunaye kombîyayîşê hewteyî yê partîya xo de qisey kerde û vat ke kesê rewşa înan kritîk yê zindanî de semedê vîrusê koronayî ke vila beno ganî bêrê veradeyene. Ebruye dîyar kerde ke serdemê bêro de derheqê tecrîdî de zî planê înan estê.

	 

	Vervatoxa HDPyî Ebru Gunay bînaya merkezê pêroyî yê HDPyî de kombîyayîşê çapemenîye serûber kerd. Ebruye derheqê kombîyayîşê Heyetê Rayberdişî yê Merkezî de qisey kerd û vat: ''Ma munaqeşeyê girîngî kerdî, birê girîngî girewtî. Wexto ke ma şîyêne kombîyayîş Selçuk Mizraki rê ceza ameye dayene, Amed de avûkatî zî tede 13 kesî ameyî destbendkerdene. Na nîşaneya dîşmenîya AKPyî ya vera kurdan a. AKP reyna vera muxalîfan bi destê huqûqî dişemenîya keno. Ma venga hukmatî danê ke polîtîkayanê dişmenîyan ê vera muxalîfan ca verdê.''

	 

	'Ma bi rihê Newroze şêrê 1ê Gulane'

	 

	Ebruye derheqê Newroze de va ke seba vîrusê corona taloq kerdê û wina vat: ''Seba weşîya şarê xo sey tebdîrê vera Korona ma bire daye ke aktîvîteyanê Newroze batal bikerê. Na seba ma zî birêka zehmete bîye. Ma do şayîya Newroze berê 1ê Gulane, ma pê bawer ê ke girseyî  heman coşî bikrişê meydanê 1ê Gulane zî.''

	 

	‘AKP semedê weşîye şarî tedbîran nêgeno’

	 

	Ebruye derheqê tedbîrê corona de qisey kerde û vat: ''Dinya de babeta Korona bi hawayêkê cidîyî yena ercnayene. La îqtîdar bi bêcidîyetî nêzdîye mesele beno. Ganî cade vera vîrusî tebdîrî bêrê girewtene, rêxistinanê weşîye reyde bi koordîne xebate bêra kerdene, tebdîrî şarî reyde bêrê parekerdene. AKP her felaket seba dewamê îqtîdarê xo wazeno bivurno firsendêk. La na meseleyêka weşî ya. Ganî cade feqîran rê hacetê hîjyenî û dezenfektî bêrê vilakerdene.''

	 

	‘Wa hepsî serbest bêrê veradayene’

	 

	Ebruye bale ante rîskê Korona ser û vat: ''Zîndanî zî warê birîskî yê.  Sere de tepişteyê nêweşî ganî pêro tepişteyê ke grûba rîskî de yê bêrê veradayene. Ma qerardar ê ke vera şerî haştîye û vera tecrîdî azadîye bipawê. Seba nînan xebatanê ma dewam kenê. Na çarçewe de ma do plananê xo pare bikerê.''