‘Girewtişê berê sînorî tesîrê ekonomîye keno’ 2020-03-13 13:49:18   WAN - Semedê vîrusê korona yo ke Çîn de dest pêkerd û heme dinya vila bi, berê sînor yê Wan-Îranî ameyî padayene û pdayîşê sînoran tesîr krîzî ser o kerd. Cinîyê Wanijî zî dîyar kerdî ke semedê girewtişê beran, problemê ekonomîye ciwîyenê û eynî wextî de vatî, hetê tedbîrê vîrus zjî qelsî estê.   Seba ke vîrusê koronayî bajarê Wuhanî yê Çînî vejîya meydan û xeylêk welatan vila bi, 121 hezar kesî dir vîrus ame tespîtkerdene. Eynî wextî de seba vîrusî tewr tay 4 hezar û 300 kesî zî cuya xo vindî kerd. 10ê Adare de zî Tirkîya de Wezîrê Weşîye Fahretîn Kocayî îzahat da û dîyar kerd ke yewin hedîseyê vîrusê korona ameyo tespîtkerdene. Yew welatê ke tewr zêde merdişê korona ame meydan Îran o. Dimayê nê berê sînorî yê Îran-Wanî ameyî padayene û na rey zî krîzê ekonomî tewr zêde xo da hîskerdene.   ‘Doktor kêm ê’   Makbule Bartuya ke taxa Xaçortî ya Wanî de ciwîyena, dîyar kerde ke padayîşê beran dir krîz giran bîyo û wina vat: “Beno ke demêko derg bi Tirkîya de estbi, la nêvatêne. Dimayê ke dewletê xerîbî vatî, ê do hemverê nêweşîye piştdayîş bidê Îran, wezaretê weşîye zî îzahatêk wina da. Xora welat de krîzê ekonomîye esto. Semedê dermankerdişê nêweşan zî hûmara doktoran zî zaf qels o.”   ‘Ganî tedbîrê hîra bêrê girewtene’   Zeynep Dumane zî arde ziwan ke dimayê îzahatê wezaretî tedbîrê ke Tirkîya de yenê girewtene qels ê û wina vat: “Tedbîrî xeylêk kêm ê. Her çiqas krîzê ekonomîye bibo zî ganî wareyê weşîye de sînorkerdiş nîno kerdene û tedbîrê hîra bêrê girewtene. Verê nê de berê sînorî zî tesîr ekonomî ser o kenê. Îran de bi hezaran kes ameyne Wan.”   ‘Eke berî nêameyne padayene, problemê cidî biameyne ciwîyayene’   Makbule Aslane zî da zanayene ke dimayê padayîşê beran problem ciwîyayê û wina vat: “Tu zanayîşê mi derheqê nêweşîye de çin o. Senîn vejîya meydan, ma zî nêzanê. Çareserî çiyo, ganî heme dinya de nê ser o xebate bêro kerdene. Lajê mi şîne Îran. Ma debara xo wina kerdêne. Nika nêxebetêno, berî ameyê padayene. La nêameyne padayene zî ma problemê cidî biciwîyayîne.”   Salîha Erole zî vat, semedo ke berî rew nêameyê padayene, vîrus wina Tirkîya de vila bîyo.