Nisêbîn de yê ke seba TOKÎ îmza eştê zî mexdûr ê yê ke nêeştê zî mexdûr ê 

2020-03-12 14:34:14


	 

	MÊRDÎN - Qedexeyê tebervejîyayîşê kuçeyan ê Nisêbînî amebi îlankerdene û 134 rojan dewam kerdib kewt serra 4ine û taxê ke ameybî rijnayene awanîyê TOKÎ ameyî viraştene. Keyeyê ke seba TOKÎyan îmza eştî zî mexdûr ê û yê ke nêeştî zî mexdûr ê. Fehîme Dogane ke îmza seba awanîya TOKÎ ke îmza eştebî wina vat: “4 serrî yo ma tapoyê xo pawenê.”

	 

	Nisêbînê Mêrdînî de dimayê îlankerdişê îdarekarîyê xoser de qedexeyê tebervejîyayîşê kuçeyan heta Adara 2016ine 5 rey ame îlankerdene. 14ê Adara 2016ine de zî qedexeyo tewr pîl dest pêkerd. Qeza, 134 rojan binê abluqa de ame girewtene. Mabêne Yewîneyê Pawitişê Sivîl (YPS) û polîs û leşkeran de pêrodayîş ameybî ciwîyayîş. Goreyê dayeyê dewlete, pêrodayîşan de 68 leşkeran cuya xo vindî kerda û 384 heb zî

	birîndar bîyê. Goreyê raporê Weqfê Heqê Merdiman ê Tirkîya Nisêbîn de 22 sîvîl ameyî qetilkerdene. La goreyê çimeyê herême û rojnamegeran pêrodayîşan de 80 ra tewr zêde cenazeyî vejîyayê.

	 

	Dimayê pêrodayîşê taxê Dîcle, Firat, Yenîşehîr, Abdulkadîrpaşa, Zeynel Abîdîn û Kilayî 5 hezar û 53 awanîyê TOKÎ ameyî viraştene. Awanî serra vîyarte de ameyî teslîmkerdene.

	 

	‘Keyeyê ma verê çimanê ma de ameyî rijnayîş’

	 

	Fehîme Dogana ke taxa Abdulkadîrpaşa de ciwîyayîne, wextê qedexeyan de mecbûr mende vejîyo û vat: “Keyeyê mi saxlem bi la bi yew darbeyêk kepçeyî rijnayî. O wext her çî ame sereyê ma. Ma heta roja peynîya pêrodayîşan mendî. Rojêk verê qedexeyê pîl ma vejîyayî. Ma cayê ma ra kerdî. Verê çimanê ma de keyeyê ma rijnayî. Ma zî temaşe kerd.”

	 

	‘Ma TOKÎyan nêwazenê’

	 

	Fehîmeye da zanayene ke înan TOKÎyan qebûl nêkerdê û wina vat: "Tapoyê keyeyê ma esto. Ma îmza seba awanîyan nêeşt. Ma nêwazenê şêrê TOKÎyan. Ma heqê xo wazenê. Înan xo rê TOKÎ voraştê, ma rê ney. Ma keyeyê xo wazenê. TOKÎ goreyê ma nîyê. Ma her wext pers kenê û vanê se bi. Ê zî vanê wa TOKÎ teslîm bibê ma do biewnê ci ra. Bi 4 serrî yo ma kîra de yê. Ganî peynî bibo.

	Heto bîn ra zî keyeyê ke îmza eştê awanîyê TOKÎ zî hema keyeyê xo teslîm nêgirewtê.