Havva Kirane: Ma sey dayîkî erjayeyê xelatêka firaz ameyî vînayene 2020-03-12 13:47:05   AMED - ‘Xelata Aştî, Dostanî û Demokrasîye’ ya DTOyî emsar erjayeyê Dayîkê Aştîye ameyî vînayene. Dayîka Aştîye Havva Kirane da zanayene ke înan xelatêka pîroz girewtê û wina vat: “Dayîkan domananê xo semedo ke bêrê kiştene pîl nêkerdî. Seba welatêko azad, seba aştîye nê domanan pîl kerdî.”   Odaya Tabîbê Amedî (DTO) her serre 14ê Adare de Hewteyê Weşîye de ‘Xelata Aştî, Dostanî û Demokrasî’ organîze kenê û rojê vîyarte de xelate ameyî dayene. Na xelate emsar semedê Dayîkê Aştîye ke serrê 90an heta nika semedê aştîye têkoşîn kerdî û Kadîr Înaniro ke pêwa heme tedayan vatişê aştîye û demokrasî de israr keno, ame dayene. Dayîka Aştîye Havva Kirane da zaneyene ke na xelate kêf û kelecanêko pîl înan de ardo meydan.   ‘Aştî texto zerdîn o, her kes nêeşkeno wayîrê ci vejîyo’   Havvaye da zanayene ke înan ke qetî fek aştîye vera nêdayê û wina vat: “Aştî texto zerdîn o, her kes nêeşkeno wayîrê textî vejîyo. La dayîkî ewro wayîrê nê textê zerdîn vejîyenê. Wa xelate bibo wesîleyê aştî û têduşîyêko mende. Waştişê ma oyo ke gonîya bi serran o herikêna bêro vindarnayene.”   ‘Aştî heqê şarê dinya yo’   Havvaye dewam de da zanayene ke Rojhelato Mîyanênî de şer yeno kerdene û heme kesî serrê nê herre de zerrî ra aştîye wazenê û wina vat: “Tîya aştî bi ca nêro, cayêk bîn de bi ca nîno. Ma dayîkî zî vanê ke; ma aştîye, têduştî wazenê. Wa na gonî vindero. Kurd beno, Tirk beno, Ereb, Ecem beno heme şarî dinya aştîye heq kenê. Welatê ke aştî çinbo, têduştî zî çin o. Eke cayêko çar merdimî bêrê têhet û dorê înan bêro girewtene no şermo tewr pîl o. Dewlete vana ke ez demokrasî û heqê merdiman pawena, gerek wina nêba.”   ‘Dayîkan domananê xo semedê bêrê kiştene pîl nêkerdî’   Havvaye peynî de wina vat: “Dayîk bîyayîşê xo yê tewr pîroz, domananê xo vindî kenê. Ma dayîkî gerek coka hemverê şer vinderê. Dayîkan domananê xo seba kiştişî pîl nêkerdî. Nê domanî seba welatêko azad ameyî pîl kerdene. Ma na xelate zaf pîroz vînenê. Ma zaf kêfweş bî. Na seba ma xelata tewr pîl a. Ma dayîkî seba aştîye xoverdayîşê xo girs bikerê.”