‘Feqîrî hetî de tehdîdê zabiteyan’ 

2020-03-10 11:59:12


	 

	AMED -  Oznûr Şene seke welatîyê bînan, semedê krîzê ekonomîye probleman ciwîyena. Oznure kuçeyê Amedî de qocik û çaketan roşena û domananê xo wey kena û vat: “Semedê krîzê ekonomî ma mecbûr mendî ke bêrê Amed û tîya zî vera feqîrî têkoşînî cuye danê.”

	 

	Tirkîya de krîzê ekonomîye her ke şino tewr pîl beno, semedê krîzê ekonomîye hûmarêka zêde kargeh ameyî padayene û bi hezaran karkerî bê kar mendî. Welatî semedê debara xo bikerê muracatê pêro cayan kerdî. Xeylêk kesî êdî kuçe û wareyan de bi erebeyê xo yê qijî ser o çîyan roşenê. Labelê xeylêk bi zor û zehmetîyan dir zî rî bi rî manenê. Yew nê karkeran ra bi nameyê Oznûr Şen a. Oznûre semedê rotişê çeket û qocikan Edeneyî ra ameya Amed. Oznûr Şene zor û zehmetîyê ke nê kuçeyan de ciwîyena ajansê ma rê pare kerd.

	 

	‘Hemverê feqîrî ma têkoşîn kenê’

	 

	Oznûr bi eslê xo Edene ra ya, aye semedê qocik rotişî bi keyeyê xo dir ameya Amed. Kuçeyê Sûrî de serdê zimistanî de hewl dana ke berardişanê xo biroşo. Bi dekewtişê Sûrî de vengê aye ke bi kurdîyêk şiknayene veng dana û vana, "Çeket û qocikê erjan û belaş, bêrê bigîrê.” Oznûre wina qalê ameyîşê xo kena: “Krîzê ekonomîye her ke şino pîl beno, bi taybet semedê merdimê feqîran, krîz hîna xidar yeno. Bi krîzî dir bê karî resayo sewîyeya tewr berz. Tîya zî barêk giran keweno serê milê cinîyan. Dimayê ke ma kar nêdî, ez û mêrdeyê xo bi 3 domananê xo dir ma ameyî Amed. Ma tîya zî têkoşînê cuye danê û hemverê vêşanîye xo ver danê,”

	 

	‘Ma heqdestê xo nêgînê’

	 

	Oznûre dewamê qalîkerdişê xo de zor û zehmetîyê ke ciwîyena qalî kerde û vat: “Ma şert û mercê zehmetî yê xozayî de ciwîyenê. Bi şewe û roj verê hewaya serd, vewre û varanî de xebityena. Goreyê berardişê roşena cayê bînan ra hîna baş o la heqdestê ma nêdanê. Yê ke gêno û roşeno heqdar o semedo ke krîzê ekonomîye esto.”

	 

	‘Ez bi şîdetî dir rî bi rî manena’

	 

	Oznûrê dîyar kerde ke ê hemverê nê şert û mercan têkoşînê xo dana, gerek nê gore nêzdî bibê û wina vat: “Helbet no zî zorê ma şino. Belê zorîyê heme karan esto la bi rastî zî xebata kuçeyan hîna zaf xidar o. Zehmetîyê mewsîmî nika zî zabite dorê ma de geyrenê. Karê ma rê zehmetîyan vejenê. Reyan îqazkerdişê zabiteyan yeno sewîyeya şîdetî.”