Mêrdîn de fînalê 8ê Adare do Qoser de bêro kerdene 

2020-03-06 14:54:40


	 

	MÊRDÎN - Îdarekara HDPyî ya Mêrdînî Munevver Bulute dîyar kerde ke do fînalê 8ê Adare ya Mêrdînî do Qoser de bikerê û vat: “Ma do a roje bi coş û têkoşînê xo wareyan de bê. Ancax cinî pêrodayîşan ro vajê bes o. Ma pêro cinîyan dawetê şolenî kenê.’

	 

	Cinî Mêrdîn û qezayê ci de semedê mîtîngê 8ê Adare amadekarîyanê xo dewam kenê. Bi rayberîya Tevgerê Cinîyanê Azadan (TJA) û Meclîsê Cinîyanê HDPyî yê Mêrdînî 8ê Adare de do bi şolenêke Kuçeyê Berçem Taş Kopruyî yê Qoserî de bikerê.

	 

	‘Serê cinîyan de tedayê pîl estê’ 

	 

	Îdarekara HDPyî ya Mêrdînî Munevver Bulute, veng da ke pêro cinî 8ê Adare de wareyan de bê û vat: “Ma startê bernameyê 8ê Adare yê Mêrdînî 28ê Sibate de Nisêbîn de da. Dimayê nê qeza de pêvînayîşê cinîyan virazîya. Ma tax bi tax, qeza bi qeza, dew bi dewe geyrayî û bi cinîyan dir yenê têhet. Cinî zaf kêfweş benê. Coşê înan her rewşa înan de dîyar beno. Ma do fînalê xo Qoser de bikerê. Serê cinîyanê Mêrdînî de tedayê pîlî estê. Hemşaredarê ma ameyî tepiştene. Qayûm ameyî tayînkerdene. Cinî bi têkoşînê xo eşkenê vernîya nê bigîrê. Ma eşkenê nê çî bidê vindarnayene.”

	 

	‘Ma pêro cinîyan dawetê Qoserî kenê’

	 

	Munevvere tewr peyîn qiseykerdişê xo de da zanayene ke cinî do bi coşê xo 8ê Adare de meydanan de bê û wina vat: “Ma do Roja Cinîyan bi coşêk pîl pîroz bikerê. Ma veng danê pêro cinîyan ke bi veng û coşê xo tewrê xoverdayîşî bibê, bêrê wareyan. Ma pêro cinîyan dawetê Qoserî kenê. Roja Cinîyan pêro cinîyan rê pîroz bo.”