Piştdayîşê Morî: 8ê Adare de wareyan de bê 

2020-03-06 13:24:46


	 

	Fîlîz Zeyrek

	 

	EDENE - Cinîyê Piştdayîşê Morî ke Edene de xebatanê xo kenê, veng dayî heme cinîyan. Çîgdem Kayhane vat, serra 2019ine heme dinya de bi xoverdayîşê cinîyan derbaz bîyo û vat: “Serra 2020ine zî do biba serra têkoşînê cinîyan. Gerek ma pêro wareyan de bê.”

	 

	Edeneyî de 8ê Adare de bi rayberîya Platformê Cinîyan ê Edeneyî, saete13.00ine de Pirda Kasim Gulekî de rayşîyayîş do dest pêbikero û heta Meydanê Ugur Mumcu do dewam bikero. Dimayê rayşîyayîşî do derbazê wareyê mîtîngî bibê. Cinîyê Piştdayîşî Morî zî xebatê xo yê 8ê Adare bê mabên dewam kenê.

	 

	‘Bi rojan verê ma dest bi xebatan kerd’

	 

	Çîgdem Ozdenîze da zanayene ke 2019ine de şîdetê serê cinîyan zêde bîyo û heme dinya de têkoşînê cinîyan zî pîl bîyo û vat: “Tirkîya de zî pêwa tadeyan, cinî vejîyayî meydanan. Semedo ke 2020ine de kiştiş, şîdet nêro ciwîyayîş û aştî bêro, ma do xover bidê. Ma cinî vera bêhuqûqîyan kuçeyan de bê. Ma bi rojan verê, dest bi xebatê 8ê Adare kerd. Ma vilawikan vila kerd û kombîyayîş kerd. 8ê Adare rojêka girîng a. Wareyêko têkoşînî yê girîng o. Ma wazenê na roje de pêro cinîyan wareyan de bivînê.”

	 

	‘Semedê aştîye ganî ma wareyan de bê’

	 

	Derya Çîçek Nare zî arde ziwan ke cinîyê ke hepsê keyeyî yenê kerdene, ganî kuçeyan de têkoşîn bikerê û vat: “Ganî pêro cinî wareyan de bê. Do serra 2020ine zî biba serra xoverdayîşî. Ma vera şîdetî, vengê xo berz bikerê. Heta ke şerî dewam bikerê, do xeylêk cinî bêrê mexdûrkerdene. Ma do 8ê Adare de waştişê xo yê şerî bîyarê ziwan. Ganî pêro cinî a roje wareyan de bê.

	 

	‘Na serre biba serra têkoşînê cinîyan’

	 

	Çîgdem Kayhane zî da zanayene ke do serra 2020ine biba serra têkoşînî û vat: “Fikrê cinîyan her serre tewr zêde aver şino. Cinî kuçeyan de heqê xo wazenê. Cinî sere nêtewênenê û sere wedarnenê. Semedê nê ez zaf bi kelecan a. Ez veng dana heme cinîyan. Ganî a roje pêro wareyan de bê.”