Cinîyê Dêrsimijî: Cigêrayîşê Gulîstane baş nîno kerdene 2020-03-05 13:26:50   Berîtan Canozer   DÊRSÎM - Cinîyê Dêrsimijî derheqê vindîbîyayîşê wendekara unîversîteye Gulîstan Dokuye ke pêwa 2 mengî ser ra derbaz bîyo, hema nêameya vînayene ser o qisey kerdî û reaksîyon vera ramojnayî. Cinîyê Dêrsimijî dayî zaneyene ke cigêrayîş rind nêameyo kerdene û vatî: “Bi zanebîyayîş hewl danê serê babete bigîrê. Vanê kewta awe, întîxar kerda. Ma bawer nêkenê ke întîxar kerdo.”   Dêrsimijî wendekara unîversîteya Munzurî ê beşê Domanan Gulîstan Dokuya ke 21 serrî ya 5ê Çele de vindî ya û dimayê vindîbîyayîşê cigêrayîşî ameyî destpêkerdene. Semedo ke Gulîstane Pirda Dînarî de tewr peyîn ameya vînayene, heme bale serê întîxarî kom bî û Awbendê Uzunçayirî xebatê cigêrayîşî ameyî destpêkerdene. Ekîbê Xelaskerdene û Cigêrayîşê yê Binawe SAK) xebatê xo dewam kenê la tu çîyêk derheqê Gulîstane de nêame vînayene. Walîtî û emnîyet bi israr vanê awe de ya û întîxar kerda. La ekîbê cigêrayîşî vanê ke sera 1 zî îhtîmalo ke cenazeyê Gulîstane awe de çinî ya.   Walitî û emnîyet vano ke awe de ya   Heto bîn ra zî yeno zanayene ke derheqê îhtîmalo ke ciwîyena yan zî ameya diznayîş ser o cigêrayîş nîno kerdene. Roja ewil ra embazê Gulîstane, semedê Gulîstane bêro vînayene têkoşîn kenê. Bendewarîyê keyeyî ke bi fikar ê zî roja ewil ra Dêrsim de dewam kenê. Ame zanayene ke gumanbar Zaînal Abarakov û keyeyê ey zî Dêrsim de nîyê û bajar ra vejîyayê.   Bajar de polîtîkayê şerî yê taybet dewre de yê   Verê Gulistane vindî biba û dimayê ci zî hedîseyê îstîsmar û tecawizî zî bajar de rojeve de bî. Nê caardişî şarî nêrehet keno û yeno qiseykerdene bajar de polîtîkayê şer yê taybet wextê ke derg o dewre de yo. Kînem Bozkurta Dêrsim de ciwîyena, arde ziwan ke vindîbîyayîşê Gulîstane biguman û naqokî yo û vat: “Ez Dêrsimij a û tîya cuyena. Serrê vîyarte de teda zêde bîyê. Ma nê baş zanê. Ma bawer nêkenê Gulîstane întîxar kerda.”   ‘Vanê ke awe de ya’    Kîneme da zanayene ke bi vindîbîyayîşê Gulîstane dir hewl yeno dayene ke çî bêrê nimtene û vat: “Ma Dêrsim de yê awe ci baş zanê. Eke tede bibayîne, heta nika rew ra ameyne vînayene. Vanê awe de ya. La tede nîya. Îhtîmalêko ameya kiştene do vejîyo meydan. Embazê Gulîstane lajê polîsî yo. Semedê nê hewl danê ke serê hedîse bigîrê. Çîyê wina Dêrsimî de nêameyne ciwîyayîş. Ma sey şarê Dêrsimî şaş mendê.”   ‘Ganî şarê Dêrsimî wayîrê Gulîstane vejîyo’   Zeynep Yetîştîrene zî dîyar kerdî ke aye bawer nêkena Gulîstane întîxar kerda û vat: “Xebatê cigêrayîşî de îhmal estê. Serra vîyarte embazêka bîn cinî xo eşte awe û întîxar kerd. Embaza Evîne ca de roja dîyîn ameye vînayene. La Gulîstane 2 mengî yo nêameya vînayene. Eke awe de bibayîne, nika ameyne vînayene. Goreyê mi întîxar nîyo. Wazenê serê hîn çîyan bigîrê. Vanê geyrenê la heta nika tu zanayîşêk nêameyo dayene. Ganî cinî bibê yew û şarê Dêrsimî wayîrê Gulîstane vejîyê û keyeyê aye tena nêverdê.”   ‘Samîmî nîyê’   Mîzgîn Çardake zî bale ante serê qelsî û îhmalê cigêrayîşî û wina vat: “Ma xeberan taqîb kenê. La tu averşîyayîş çin o. La tu averşîyayîş çin o. Bajarê ke ma ciwîyenê, hedîseyê winasî ma eciz kenê. No 2 mengî yo hema nêameye vînayene. Dewlete serê hedîse de nêvindena. Awe de bibîyayîne do nika rewra biameyîne vînayene. Ganî semedê vînayîşê dewlete her hetî xebatan bikerê. Tena awe de geyrenê û no zî samîmî nîyo.