Newaya Jin bi manşetê ‘Dinya do pê cinîyan bivurîya’ vejîya 

2020-03-02 15:15:53


	 

	MERKEZÊ XEBERAN - Rojnameyê cinîyan Newaya Jin seba menga adare hûmarêka taybete weşanaye. Rojnameyî asta herêmîye ra heta asta unîversale giranîye daye têkoşînê cinîyan ser.

	 

	Rojnameyê Newaya Jin hûmara xo ya 180ine çap kerde. Rojname bi manşetê ''Dinya do pê cinîyan bivurîya'' vejîya û hûmara xo ya adare de meydanê herêmîye ra heta unîversale giranîye daye têkoşînê cinîyan ser.

	 

	Nuştox Hêja Zerya na hûmare de bale ante krîzê pêroyî yê têgêrayîşê femînîstî ser.

	 

	Zerya Gul zî bi nuşteyê xo yê ''Şerê Dinya yo Hîrêyîn'' nîşan kerd ke rolê wedaritişê azadîya cinîyan teslîmê Erdogan bi.

	 

	Dîlan Bozgane, bi dosya-xebera xo bala ante dansê Lastesîsî û qirkerdişê cinîyan ser.

	 

	Buşra Alîye qala serewedaritişê şarê Lubnanî û rolê cinîyan ê Lubnanî kerde.

	 

	Hacer Altunsoye têkilîya mabênê camêrdi keye û dewlete analîz kerde.

	 

	Rojnamgere Esra Çîftçî vernîyazê efûkerdişê tecawuz û tacîzê domanan ercna.

	 

	Nîgar Yildirime zî vurnayîşê îklîmî ercna.

	 

	Cinîyanê Ewropa, teşrîna verêna 2019î de pê vengdayîşê Kongreya Starî vera hêrişanê dewleta tirke yê serê Rojawanî zaf welatanê Ewropa de Women Defend Rojava (Cinîyî Rojawan Pawenê) awan kerd. Hêlîn Dîrîk temsîlkaranê komîteyan reude qisey kerd û armancê ronayîşê nê komîteyan ser o vindert.

	 

	Newroz Cîzre qala embaza xo Fermandara YJA-Starî Berçeme Cîloya ke serra 2017î de Çewlîg de şehîd bîye kerde.

	 

	Rîpelê Kurdî de xeylêk analîzê taybet ameyî weşaneyene. Têkoşînê şarî yê Îranî, heta bi rayberîya cinî û rewşa bîyaye, bi endama Koordînasyonê KJARî Ciwana Sine dir roporatjêk ame kerdene.

	 

	Wekîla HDPyî Dersim Dage kerdişanê faşîzanan ê Tirkîya ser o nuşt. Roza Metîna qala rolê hunerî û kulturî yê averşîyayîşê komelî û têkoşînê estbîyayîşî de kerde. Gulîstan Îke bale ante xoverdayîşê cinîyan ser.