Planê stratejîyê qeyûm de cinîyan rê butçe nêamî visnayene 2020-02-26 13:44:13   MÊRDÎN - Şaredarîya Şaristanê Gird ya Mêrdînî ke qeyûm ci rê amebi tayînkerdene, planê stratejîyê serra 2020-2024 de seba cinîyan butçe nêame visnayene. Hemşaredara HDPyî Fîgen Altingada ke qeyûm tayînê vera ci bi, dîyar kerde ke verê ke qeyûm bêro tayînkerdene, planê ke amade kerdêne zî nêmcet mend.   Şaredarîya Şaristanê Girdî ya Mêrdînî ke qeyûm ci rê amebi tayînkerdene planê stratejîyê 2020-2024ine eşkera kerd. Semedê Serekîya Daîreyê Cinîyan û Ciwanan tu butçe nêame visnayene û serekîyê bîn rê zî butçeyê pîl ameyî visnayene.   ‘Stratejîyê ke kerdişanê înan binimno ameyê dîyarkerdene’   Fîgene da zanayîş ke qeyûman pêro sazgehê cinîyan paday û qalîkerdişê xo wina dewam kerde: “Sazgehê cinîyan ameyî padayîş, mudurê camêrdan tayînê sazgehan kerdî û cinîyan kar ra vetî û mobîng serê înan de kerdî. No zî nêzdîbîyayîşê qeyûman vera cinîyan ramojneno. Semedê nê zî planê stratejî de seba cinîyan nêvisnayîşê buçteyî nêzdîbîyayîşê qeyûman ramojneno. Qeyûman reyna sey verê zafê şîyayîşan semedê xebatan ney, semedê konser yan zî hacetê xelate visnayê. Ma wazenê nê sîstemî bivurnê.”   ‘Ma do nê sîstemê pûyaye verpay bikerê’   Fîgene tewr peyîn qiseykerdişê xo de da zanayîş ke dimayê weçînayîşan dest bi xebat û planê xo kerdê û va: “Labelê qeyûm tayîn kerdî. La no nîno a mana ke têkoşîn tîya qedêno. Ma do pêro pîya nê sîstemê pûyaye verpay bikerê.”