8ê Adare dîyarîyê Gulîstane kerdî: Do têkoşînê ma tewr zêde pîl bibo 2020-02-26 13:07:11   Fîlîz Zeyrek   EDENE - Endamê Platformê Cinîyan ê Edeneyî, 8ê Adare Roja Cinîyanê Dinya diyarîyê Gulîstan Dokuye ke Dêrsim de vindî bî û hema zî nêameya vînayene kerdî. Endamê platformî dîyar kerdî ke bi hewayêko xurt do 8ê Adare pêşwazî bikerê û vatî, destkewtişê înan zî netîceyê piştdayîşê cinîyan o.   Endamê Platformê Cinîyan ê Edeneyî, dîyar kerdî ke bernameyê xo yê 8ê Adara emsarî dîyarîyê wendekara Unîversîte Gulîstan Dokuye ke 5ê Çelî ra Dêrsîm de vindî bîya, kerdê.   ‘Ganî pêro cinî beşdarê têkoşînî bibê’   Endama Platformê Cinîyan ê Edeneyî Cansu Şahîne, bale ante serê kiştişê cinîyan û va, do wareyan de vengê xo bidê eşnawitiş û wina dewam kerde: “8ê Adare seba ma xeylêk girîng o. Ganî pêro cinî beşdarê têkoşînî bibê. Beno ke o wext hîn çî bêrê vurnayîş. Derheqê Gulîstan Dokuye de tu averşîyayîş çin o. Xeylêk dewayê sey Gulîstan Dokuye estê. Vera nê îhlalkerdişan do cinî têkoşîn bikerê û encax bi no hewa eşkeno netîce bêro girewtene.”   ‘Pêwa pêro astengîyan ma xurt ê’   Ulku Gulşene da zanayîş ke 8ê Adare roja ke cinî waştişê têduştî û azadîye, roja pîlkerdişê piştdayîşî û têkoşînî yo û wina va: “20 serrî ra zêde yo, ez Platfomê Edeneyî de xebityena. Her serre tewr zaf hişmendî virazêna û cinî kewenê wareyan. Ma cinî rastê tedayan ameyî. Hewl dayî vernîya xebatan bigîrê la têkoşînê ma hîna zêde bi û do hema tewr pîl bibo.”   ‘Bi rojan o vindîbîyaye ya’   Yeşîm Tukele zî Gulîstan Dokuye arde vîr û wina va: “Embaza ma bi rojan o vindîbîyaye ya. La xebatê vînayene zaf nînê kerdene. Kesê gumanbar nînê destbendkerdene. Semedê kiştoxê cinîyan cezayê sey xelat yenê dayene. Semedê rewşa baş û tahrîkê bê heq ceza yenê vistiş. Ma wazenê ke pêameyîşê Stenbolî bêro bi caardiş. Seba ke kiştoxan rê cezayê lazim bêrê dayene. Ma do Tirkîya de taqîbkerdoxê nê bê û têkoşînê xo pîl bikerê.”   Endama platformî Gulşah Şahîne zî va ke cinî her wareyî de rastê tedayan yenê û wina va: “Ganî ma vera nê bêrê têhet, bibê yew. Yê ke şîdet pawenê estê. Dadgehan de sîstemêko cezayan fîneno esto. Ganî ma 8ê Adare de tewr zêde vejîyê kuçeyan. Ancax bi no hewa ma eşkenê vernîya şîdetî bigîrê.”