Di wayê ke Sûrîye ra koç kerdê bi rotişê destmalan debara xo kenê 

2020-02-23 11:03:29


	 

	Fîlîz Zeyrek

	 

	EDENE - Di wayê Evra û Ayşa ke 5 serrî verê seba hêrişê DAIŞyî yê hemverê Sûrîye ra şaristanê Helebî ra koçê Edeneyî kerdî, bazara taxe ya Şakîrpaşa de destmalan roşenê û bi nê hewl danê ke cuya xo dewam bikerê.

	 

	Çeteyê DAIŞî 2014 de hêrişê Sûrîye kerd û bi hêrişî dir bi hezaran kesî mecbûr mendî herra xo terk bikerê. Bêguman şertê ke yenê ciwîyayîş de bedelo tewr pîl cinî û domanî danê. Domanê ke baro giran yê şerî wedarnenê, şertê zor û zehmetan de cuya xo dewam kenê. Evraya 10 serrî û Ayşaya 8 serrî wayê yewbînan ê. Helebî ra 5 serrî verê koçê Edeneyî kerdê. Nika taxa Şakîrpaşayî bazarê taxe de destmalan roşenê û pê debara xo kenê.

	 

	Şar çîyêk bi wehşet o’

	 

	Wexto ke şer ameyo ciwîyayîş Evraye 5 serrî bîya û rêçê şerî hema serê ci de estê. Evraye wina vat: “Ez qij bîya. Her kes bi cayêko de remayne, qîrayne. Ma zaf tersayî bî. Dayîke mi, ma kerd odayêka. Dayîka mi zaf bermayne. Ma fehm nêkerdêne se beno. Ma 6 wayê û birayê. Ma pêro qij bî. Vengê sîlehan ameyne. Zaf bi wehşet bi. Dima cû ma ameyî tîya. Ma tîya zî xeylêk zor û zehmetî ant. Me keye nêdî. Çewî keye nêdayîne ma. Dayîka mi şîne baxçe kar kerdêne. Tay pere qezenc kerdêne, ma keye kîra kerd. Seba hetkarîya dayîke xo ma zî dest bi kar kerd.”

	 

	‘Seba krîzî ma zêde pere qezenc nêkenê’

	 

	Evraye ard ziwan ke hewte ra reyke şaristan de tezgahê xo akenê û saete mabêne 08.00 û 18.00 de xebityenê û wina vat: “Ma destmalan roşenê. Ma cayêko nasî ra gênê û roşenê. Seba krîzê ekonimî, ma zêde pere qezenc nêkenê. Zêde çew nêgîno. Reyna zî ma pereyê nanê xo vejenê.”

	 

	Evraye tewr peyîn qiseykerdişê xo de da zabayene ke şer çîyêko xirab o û wina vat: “Ma rastê nêzdîbîyayîşê nîjadperestî yê merdiman ameyî. Ma bi kêfî nêameyî tîya. Vanê, ‘Sûrîyeyij ê’ ma cîya vînenê. Ma çîyê nêbaş cuyayî. Tîya zî merdimê nêbaş estê. Ma wazenê welatê ma azad bibo û ma bigeyrê herra xo ser o.”