Wareyêko aîdê cinîyê ciwanan: Kaktus 

2020-02-22 12:04:20


	 

	STENBOL- Komeleya Cinîyê Ciwanan ya Kaktusî, sey nûqtayê pêvînayîşê cinîyan ame akerdene. Endama Kaktusî Yaren Tuncere dîyar kerde ke do nê wareyî de pederşahî cinîyan dir munaqeşe bikerê û vat, înan waşto ke cinîyê ciwanî ke keye de odayêk înan çin a, wa komeleyêka înan pîl biba.

	 

	Komeleya Cinîyê Ciwanan ya Kaktusî, Kadikoyê Stenbolî de ya û demêko verî ameye akerdene. Kaktus seba cinîyê ciwanan wareyêko newe pêşkêş keno û dêsê ci de fotografê cinîyanê şorişgêrî û kitabxaneyî Şule Çete esto. Endama komeleye Yaren Tuncere da zanayene ke ê Kaktusî ra wazenê têkoşînê azadîya cinîyan berz bikerê û vat ê wazenê tîya bi cinîyan dir bêrê têhet, rêxistin bikerê, munaqeşe bikerê bidê musnayene. 

	 

	‘Wareyêko aîdê cinîyanê ciwanan çin o’

	 

	Yarene wina vat: “Xeylêk cinîyê ciwanî, keyeyê înan de odayêk aîdê înan çin o. Cinîyê ciwanî keye de tena waştişê keyeyî bi ca anê. Wareyêko înan ke bi rehetî televîzyon temaşe bikerê, kitaban biwanê çin o. Cinîyê ciwanî tu cayêk de wareyê înan ke bêrê têhet çin o. Cinîyê ciwanî yewbînan ra yenê visnayene û tecrîdkerdene. Ma bi tacîz, tecawiz û şîdetî dir rî bi rî manenê. Wazenê bi ma bidê qebûlkerdiş ke; heqê to seba tu çîyêk çin o. Sîstemê serdest yê camêrdan, çîyo ke ferz keno no yo. Ma zî nê wareyî de waşt çîyêk bikerê. Ma nê ser o Kaktus akerd.”

	 

	‘Ma do derheqê têkoşînê azadîya cinîyan de munaqeşe bikerê’

	 

	Yarene derheqê xebatê xo de zî şîrove kerd û wina vat: “Ma do atolyeyê ziwanan viraznê. Ma do ziwanê bînan bimusê. Ma do resiman xêz bikerê. Ma do drama bimusnê. Ma do derheqê têkoşînê azadîya cinîyan de munaqeşe bikerê. Ma her yew Helîn Palandokene yê. Ma her yew Ceren Ozdemîre yê. Ma her yew Şule Çete yê. Eke Şule Çete nêameyne qetilkerdene, nika verê ma de bî. Seba Şule Çete biciwîyo, şexsê pêro cinîyê ke ameyê qetilkerdene de ma kitabxane akerd. Ma do atolyeyan viraznê. Ma do felsefe tîya pîya munaqeşe bikerê. Ma do têkoşînê cinîyan û sîyaset tîya munaqeşe bikerê.”