Ciwanê ke Mêrdîn de ameyî destbendkerdene: Polîsan ma tehdîd kerd 

2020-02-19 13:33:19


	 

	MÊRDÎN - Mêrdîn de ciwanê ke 14ê Sibate de ameyî  destbendkerdene û 17ê Sibate de dimayê îfadeyî serbest ameyî veradeyene, dîyar kerdî ke ê tepişnayîş de rastê tehdîd û caardişê xirab ê polîsan ameyê.

	 

	Mêrdîn de 14ê Sibate de bi sebebê 21in sergerra komployê mîyanneteweyî sereştişê keyeyan ame kerdene û merkez û qezayan de pêroyî 16 kesî ameyî destbendkerdene. Xeylê xo ciwanî bî û dimayê destbendkerdene 17ê Sibate de serbest ameyî veradayene. Ciwanê ke serbest ameyî veradayene dîyar kerdî ke tepiştiş de polîsan binê nameyê ‘mulakatî’ de înan dir sohbet kerdê û înan ra vatê, ‘Ti ewro hetkarî bide ma, ma do zî her babete de hetkarê şima bê.'

	 

	'Ma ameyî tehdîdkerdene'

	 

	Saît Sirdaşo ke Qoser de ame destbendkerdene wina vat: "Seba 6 mulakatan vendayî ma. Ma zî nêwaştêne ma şêrê. Qiseykerdişê vernê de vatişê înan resayî sewîyeya tacîzî. Vatî, ‘ma zanê ti kam ê, ti çi karî kenê.' Dima ra polîsêko kamera ramojna mi û vat, ‘Biewne tîya kamera esta, ma nêeşkenê çîyêk bikerê. La ma zanê tî ça de yê, şinê ça. Eke ez to tîya bigîrî, kes nêeşkeno to destê mi ra vejo.' Mi ver anê tehdîdan çîyêk nêvat. Çîyêk vatî mi qebûl nêkerd û vatî, ‘Ti ma rê bibê hetkar, ma do hetkarîya ekonomîye bidê to."

	 

	Waştişê ajantî

	 

	Saîtî dewam de va ke prosesê 4 rojî tepiştîşî de tedayê psîkolojîk caardê û wina vat: "Vernê de polîsê xirab, peynî de polîsê baş kay kerdî. Yê ke vatî, ‘ma do teber de yewbînan bivînê' dima ra çay dayî mi. Vatî, ‘ma zî birayê to yê, lazimîyê to çi bibo vaje.' Ma nêzanayne ke çira ma ameyê destbendkerdene zî. Mulaqatan de pêro çî ferz kerdî."

	 

	Cinîyêka bîn ke amîbî destbendkerdene zî wina vat: “Vatişê sey, vengê to weş o, ma rê deyîran vaje. Ti kamî bena ko?' vatî. Tepiştiş de mi waştişê mulaqatî qebul nêkerd. Polîsan tepiştiş de nameyê embazê mi xebitnayî û tedayî kerdî. Bi hewayêko cîya ajantî ferz kerdî."