'Hukmat bi hemkarê sucê hêrişê cinsî la ma do destûr nêdê nê' 

2020-02-18 13:23:14


	 

	Gulîstan Azak

	 

	STENBOL - Îdarekarê Lîseya Anadolu ya Merkezî yê Cizîrî Burak Ercano ke vera 30 ra zêdeyîr wendekaran rê hêrişê cinsî kerd, bi sebebê 'asayîşî' tayînê wendegehêko Stenbol de yo amebi kerdene. Sereka Şubeyê Hûmara 7î ya Egîtîm Senê ê Stenbolî Ozlem Toluye reaksîyon vera rewşe da û vat, qerarêko ameyo dayene sîyasî yo. Sekretera Cinîyan a Hûmara 1ê Egîtîm Senî yê Stenbolî Hurrîyet Tarhane zî vat, hukmat hemkarê sucê hêrişê cinsî yo.

	 

	Şirnex de Îdarekarê Mudûrê Lîseya Anadolu ya Merkezî ya Cizîrî Burak Ercanî bi sebebê asayîşî, tayînê wendegehêko Stenbol de yo amebi kerdene. Rêxistinê cinîyan vera nê reaksîyon ramojnayî û bi çalakîyan protesto kerdî. Meclîsê Cinîyan ê Stenbolî yê KESKî zî reaksîyonê xo ramojnayî. Meclîsê Cinîyan ê KESKî ê Stenbolî îzahatê Şubeyê 2yîn ê Egîtîm Senî yê Stenbolî de ame dayene de, dîyar kerd ke hukmat hemkarê hêrişê cinsî yo. Sereka Şubeyê Hûmara 7î ya Egîtîm Senî yê Stenbolî Ozlem Toluye û Sekretera Cinîyan ya Hûmara 1î ya Egîtîm Senî ya Stenbolî Hurrîyet Tarhane dîyar kerdî ke gumanbar qetî bêro cezakerdene.

	 

	'Hêrişê cinsî nêvînayene yenê'

	 

	Ozlem Taluye da zanayene ke vejîyayo meydan mamosteyî 30 wendekarî tacîz kerdo, qetî lezabez domanan ra bêro dûrfistene û wina vat: "Mabêne mamosteyê ke fikrê xo anê ziwan û mamosteyê ke tecawizkarê eynî polîtîka nîno meşnayene. Tecawizkarî yenê pawitene û qerarêko hukmat dayo zî qerarêko sîyasî yo. No çîyêk bêro qebulkerdene nîyo. Kesêko cay qij sey Şirnexî de çîyêk winasî keno, do cayêk pîl sey Stenbolî bi rehetî bikero. No qerar yeno manayêka 'Haydê şo Stenbol, zerrîya to senîn wazeno wina bikere.' Tu vatene nê çin o. No nêzdîbîyayîş ramojneno ke tacîz, tecawiz û îstîmar nînê vînayene. Ma wazenê no kes, ganî wezîfe ra bêro dûrvistene."

	 

	'Gelo hukmat senîn wina qerar dano'

	 

	Hurrîyet Tarhane zî da zanayene ke hukmat bi no qerarî, bîyo hemkarê sucî û wina vat: " Hedîseyê hêrişê cinsî, zêde bîyê. Hêrişê cinsî sucê merdimayî yê. Nêvînayîşê sucî zî hemkarbîyayîşê sucî yo. Burak Ercano ke 30 wendekarî îstîsmar kerdo, bi sebebê asayîşî tayînê Stenbolî kenê. Bi rastî zî hişê merdiman nê çî nêgîno. Gelo hukmat qerarêko winasî senîn gêno? Komelî de vengêko pîl da. Ma do pey na hedîse de bê. Ma do destûr nêdê ke no kes wezîfe bikero. Vera ke ganî domanan ra dûr bêro girewtene, cayêko sey Stenbolî de wezîfe keno. Seba ke  gumanbar bêro cezakerdene ma do fek hedîse ra vera nêdê."