Pero Dundare: Tecrîd bi têkoşîno rêxistinkerde eşkeno bêro şiknayene 

2020-02-18 12:51:46


	 

	Berîtan Canozer

	 

	AMED - Parlamentera HDPyî Pero Dundare tecrîdo girankerde yê serê Rayberê PKKyî Abdullah Ocalanî de şîrove kerd û vat: "Birêz Ocalanî pêwa tecrîdo giran, nê kayî veng vetî."

	 

	Parlamentera HDPyî ya Mêrdînî Pero Dundare, derheqê tecrîdê girankerde yê serê Rayberê PKKyî Abdullah Ocalanî şîrove kerd û da zanayene ke eynî wextî de tecrîd tesîrêko pîl serê cinîyan û şarî keno.

	 

	Peroye da zanayene ke Abdullah Ocalanî 15ê Sibata 1999 de ardî Tirkîya û a roje seba şaran ‘rojêka sîya’ bî û wina vat: "Gerek bêro zanayene ke esas de ameyne waştene ke şerêko mîyanneteweyî bêro viraştene. Bi teslîmkerdene Birêz Ocalanî, waştî Tirk û Kurdan bikerê şerêko giran. Amancê komployê 9ê teşrîna verêne zî no bi. La dîyî ke bi ser nêkewtî, bi 15ê Sibate dewam kerdî û waştî ke Rojhelato Mîyanên de şerêko vejê."

	 

	Peroye arde ziwan, kesê ke waştêne nê konseptê şerî dewam bikerê, Abdullah Ocalanî sey sebebê şerî nîşan dayî û wina vat: "1993 de waştî adirbest bikerê. Pêvînayîşî ameyî kerdene. Dewlete û dinya vernîya adirbestî girewtî. Na babete de merdişê Turgut Ozalî ame rojeve. Yê ke nêwaştî aştîye bêro Rojhelato Mîyanên, nê komployî heta 99 dewam kerdî."

	 

	'Pêwa tecrîdî kayî veng vet'

	 

	Peroye da zanayene ke wexto ke Abdullah Ocalanî teslîmê Tirkîya ame kerdene, serekwezîrê demî Bulent Ecevîtî vatib, ‘mi fam nêkerd çira dayî ma' û wina vat: "Seba ke waştî Tirkîya bikerê mîyanê adiro pîl. Birêz Ocalanî pawitene xo de vat, 'Înan waşt şer vejê' û vatib, semedê aştîye çi destê ey ra yeno keno û kayî dewletan veng veto."

	 

	'Tecrîdo girankerde dewam keno' 

	 

	Peroye qiseykerdene xo de da zanayene ke  şexsê Abdullah Ocalanî de tecrîdo giran welat de ameyo ferzkerdene, 20 serrî yo dewam keno û wina dewam kerde: "Semedê wedaritişê tecrîdî, grevê vêşanîye ameyî destpêkierdene û 200 rojî dewam kerd. Dimayê grevî pêvînayîşî ameyî kerdene, la reyna proses ame xetimnayene. Tecrîdo giran dewam keno. Tecrîd bi têkoşîno rêxistinkerde eşkeno bêro şiknayene."

	 

	'Gerek Tirkîya peynîya tecrîdî bîyaro'

	 

	Peroye tewr peyîn qiseykerdişê xo de wina vat: "Heqê ciwîyayîşê ma, heqê qiseykerdene ma xetere de yo. Cinî her roje vindî benê. Bi tacîz û tecawizan dir rî bi rî manenê. Şer her ke şino kûr beno. Coka hem hêzê mîyanneteweyî hem zî Tirkîya cewab bido. Ganî ma cinî, vatene xo yê vera tecrîdî bi qerar bîyarê ziwan. Tecrîd sûcê merdimayî yo. Ganî Tirkîya peynîya tecrîdî bîyaro."