Cinîyê Mexmûrijî bi ziwanê xo musenê wendiş û nuştiş 

2020-02-17 15:49:17


	 

	
		MEXMÛR - Wargehê Multecîyan ê Mexmûrî, seba cinîyan dewreyê perwerdeyê wendiş û nuştişî ame destpêkerdene. 21 cinî tewrê dewreyî bî û vatî: "Wexto ke merdim bi ziwanê xo museno wendiş û nuştişî, merdim eşkeno ziwanê cîya zî bimuso."
	
		 
	
		Cinîyê ke Wargehê Multecîyan ê Şehîd Rûstem Cûdî (Mexmûr) de ciwîyenê, bi 26 serrî yo mîyanê şert û mercê zehmet de cuya xo dewam kenê. Eynî wextî de cinî vera amborgoyê hemverê wargehî kar û xebatê xo dewam kenê. Meclîsê Cinîyan ê Îştarî yê Mexmûrî bi rayberîya Akademîya Şehîd Jiyane de perwerdeyê wendiş û nuştişî dayî destpêkerdene. 21 cinî tewrê perwerdeyî bî. Perwerde hetê mamostayê Akademîya Şehîd Jiyane ra yenê dayene.
	
		 
	
		Cinîya bi nameyê Ezîze Sêrte 50 serrî ya û tewrê perwerde bîya wina qalî kerde: "Ez 50 serrî ya û mi newe dest bi wendişê ziwanê kurdî kerd. Îmkano ke seba ma ameyo amadekerdene girîng o. Gerek merdim nêvajo, emrê mi hende yo ez nêmusena. Her çi pîl yan zî qij beno wa xo aver bero. Domanîya xo de tena mi heta yew wend. Semedo ke pîyê mi nêverda ez şêra wendegeh û vatêne, domanê kênayî nêeşkenê şêrê wendegeh. No dewrê diyîn o ke ez tewrê perwerdeyî bena. Her roje çîyêk musena. Ganî vernîya domanê kêna û cinîyan nêro girewtene. Ganî ma bi perwerde, ziwanê xo aver berê."
	
		 
	
		Eyşe Yildize zî tewrê perwerdeyî bena û qalê rewşa xo kerde û vat: "Verê wendişê domanê kênayan qedexe bi. Eynî wextî de zî keyeyî nêverdayne ma biwanê. Lazimê ma pêrûne bi wendiş û nuştiş esto labelê bi ziwanê xo. Ez tîya bi ziwanê kurdî musena wendiş û nuştiş. Eke ma bi ziwanê xo wendiş û nuştiş nêmusê, ma do nêeşkê ziwanêko bîn zî bimusê."