Dayîka hepsî ra vengdayîşê hîsgêrî 

2020-02-17 14:18:38


	 

	MÊRDÎN - Resmîye Baybarse dîyar kerde ke di lajê aye tepişnaye yê û vat ganî nê tedayî peynî bi û vat: "Di lajê mi rê ceza ameye birnayene. Zindanê cîyan de yê. Lajê min o ke zindanê Osmanîye de maneno, di serrî yo hucreyê yew kesî de yeno tepiştene û seba îşkenceyo ke dîyo, dejê ci zêde yê la nînê dermankerdene. Ez seba hepsîyan, vengdayîşê hîsgêrî kena."

	 

	Resmîye Baybarse ke di lajê aye tepişnayeyê dîyar kerde ke lajê aye Abdulkadîr Baybarsî ke zindanê Osmanîye de yo, seba pawitişo ke roniştiş de kerdo, bi di serrî yo hucreyê yew kesî de yeno tepişnayîş. Resmîyeye da zanayene ke verê muracatê ÎHDyî kerdê la çîyêk nêameyo kerdene û vengdayîşê piştdayîşî kerde.

	 

	'Di serrî yo hucre de yeno tepiştene' 

	 

	Resmîyeye da zanayene ke qedexeyê tebervejîyayîşê kuçeyan ê 2015-2016 ê Nisêbînî de di lajê aye ameyê tepiştene û ceza girewtê û vat: "Abdulrahîm zindanê Sîlîvrî de maneno. Endamîyê rêxistine ra 20 serrî ceza ci rê birnayî. Abdulkadîr zî zindanê Osmanîye de yo, di rey cezaya muebeto giran ci rê ame birnayene. 2018ine de menga çelî de seba ke pawitişê dadgehe, kerdî hucraya yew kesî. Nêverdenê kes ey dir pêvînayîş bikero. Kitab û cilê ke ma eşrawenê, nêdanê ci. Vanê ke gerek ti her çî tîya bigîrê."

	 

	'Gardîyanan hucra de oyî derb kerdê'

	 

	Resmîyeye dewamê qiseykerdene xo de arde ziwan ke seba ke lajê ci tena maneno vengê ci kewtê û vat: "Di serrî yo tena maneno. Ma ra dûrî yo. Ma nêeşkenê her wext şêrê. Ma bi telefon ey dir qisey kenê. Vengê ci zaf kewto. Çîyêko yenê sereyê ci, ma ra nêvano. Di mengî verê ma şî pêvînayîşê ci, gardîyanan hucra de oyî derb kerdê. Zincîya ci mor bîbî. Ganî lezabez peynîya îşkenceyî bîyarê."

	 

	'Rêçê îşkenceyî hema zî estê'

	 

	Resmîyeye tewr peyîn qiseykerdene xo de da zanayene ke lajê aye Abdulkadîrî zî gama ke ameyo tepiştene, rastê îşkence ameyo û wina vat: "Seba îşkenceyî dejê ci esto. La hema zî nêameyo dermankerdene. Her tewir îşkence bi ci kenê. Nika hucre de yo. Ma nêzanê rewşa ey senîn a? Wa fek domananê ma ra vera bidê."