Dayîkê Aştîye: Vera tecrîdî vengê xo berz bikerê 

2020-02-13 14:08:15


	 

	Berîtan Canozer/ Medya Uren

	 

	AMED - Endamê Meclîsa Dayîkê Aştîye 21ê sergerra 15ê Sibate de şîroveyê xo ardî ziwan û vatî: "Waştişê pêvînayîşê keye û avûkatan yeno astengkerdene. Tecrîd her ke şino, yeno girankerdene. Tecrîd sûc o û vera tecrîdî ganî ma vengê xo berz bikerê."

	 

	15ê sibata 1999ine de Abdullah Ocalanî bi komployêko mîyanneteweyî ardî Tirkîya, serê komployî ra 21 serrî derbaz bi. Heta roja ewro hemverê Abdullah Ocalanî tecrîdêko bi sîstem yeno meşnayene. Pêvînayîşê keyeyan û avûkatan yeno astengkerdene.  Tewr peyîn keyeyî 5ê hezîrane û 12ê tebaxa 2019 de pêvînayîş kerdibî. 12ê tebaxe ra heta ewro pêro muracatê keyeyî bêsebeb ameyî redkerdene. Avûkatî zî tewr peyîn 2yê gulane, 22yê gulane, 12ê hezîrane, 18ê hezîrane û 7ê tebaxa sala 2019ine de şîbî pêvînayîş. Avûkatî 7ê tebaxe ra heta ewro her hewte muracatê dozgerîye kenê, la heta nika pêro muracatê înan bêcewab mendî.

	 

	Hemsereka Kongreya Komelî ya Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene 8ê teşrîna peyêne 2018ine de vera tecrîdî Îmralî dest bi grevê vêşanîye bêdem û bêdore kerd. Çalakîye her ke şî hîra bî û bi hezaran hepsî dest bi gevî vêşanîye kerdî û 30 hepsî zî dest bi rojeyê mergî kerdî. Heto bîn ra                                    Dayikê Laçeksipî seba bibê vengê hepsîyan kewtî mîyanê lebate. Grevê vêşanîye û çalakîya Dayîkê Laçeksipî mîyanê raya pêroyî de veng da. 22yê gulane de avûkat şî Îmralî û pêvînayîş kerdî. Dimayê pêvînayîşî û bi vengdayîşê Abdullah Ocalanî grevê vêşanîye peynî bî. Dima ra pêvînayîş ameyî astengkerdene û tecrîd ame girankerdene. Bi nêzdîbîyayîşê sergerra komployî endamê Meclîsê Dayîkê Aştîye yê Gever û Edeneyî bale ante serê tecrîd û şîroveyê xo ajansê ma rê pare kerdî.

	 

	'Vengê xo berz bikerê'  

	 

	Endama Meclîsê Dayîkê Aştîye Geverî ra Emîne Atake komployê mîaynneteweyî şermezar kerd û wina dest bi qiseykerdene xo kerde û vat: "Şexsê rayberî de tecrîd serê her çar parçeyê Kurdistanî de yeno meşnayene. Gerek ma bikewê ferqê dêsê ke hetê ma ameyê ronayene. Vera nê dêsan, ma wirzê serê lingan û kuçeyan de vengê xo berz bikerê. Gever de tena se qerargehê polîsan estê. Her ca de kontrol esto. Nê çî zî yenê manaya tecrîdî yo. Ganî no tecrîd, her tewir bêro şiknayene."

	 

	'Tehemulê laçekanê ma nêkenê'

	 

	Sêvê Aslana ke qezaya Ceyhanî ya Edenî de ciwîyena, şîroveyê xo derheqê tecrîdî wina arde ziwan: "Tecrîd hemverê Rayberê PKKyî Abdullah Ocalanî de yeno manaya tecrîdê vera cinîyan zî. Nê esasî ser o ganî taybet cinî vera tecrîdî sere wedarnê. No çi seba aştîye şaran û azadîya rayberî lazim o. Ganî hemverê tecrîdî ma bibê yew û wirzê serê lingan. Ma nika vînenê ke îqtîdar senîn hêrişê erj û deskewtene cinîyan keno. Zindanan de tena hepsîyê sîyasî estê. Ma seba çareserî her wext mîyanê hewldayîşî de yê la îqtîdar nêwazeno ma fam bikero. Tehemûlê laçekan yê sipî nêkenê. La ganî bêro zanayene ke ma do her wext pey dewa de bê."

	 

	'Vera tecrîdî wirzê serê lingan'

	 

	Sakîne Toprake zî Edene de ciwîyena û vat: "Ganî êdî kurdî aya bibê. Çar hetê ma bi dişmanan pirr o. Wa ewro ciwan, cinî, pîlî pêro wirzê serê xo û vera îqtîdarî sere wedarnê. Ganî ma zulmî qebûl nêkerê. Ma vînenê ke hukmat vera Rayberê PKKyî Abdullah Ocalanî tecrîdo giran bi ca anê. Vera komele, partî, rêxistin, sazgeh û kesan hêriş yeno kerdene. Seba ke ma vanê ke ma kurd ê. No zî yeno manaya tecrîdî yo. Ma veng danê Şarê Kurdî kenê ke vera tecrîdî wirzê serê lingan. Amancê ma û omidê ma her wext azadî û hizûr o."