Avûkat Gulşene: Qerarê  DDByî yê derheqê Abdullah Ocalanî de do nimûne bo  

2020-02-07 15:24:45


	 

	Rengîn Azîzoglu

	 

	AMED - Avûkat Parêzer Gulşen Ozbeke qerarê DDByî yê derheqê kampanyaya ke azadîya Rayberê PKKyî Abdullah Ocalanî waştêne, şîrove kerd û vat: “Yê ke wazenê tecrîd wirzo, waştişêko meşrû kenê. Deheqê nê kesan de tehqîqat û muhakeme nîno qebulkerdene. Ez bawer a ke do qerarê DDByî dosyaya winasî nimûne bo."

	 

	Derheqê di kesê ke çarçeweya kampanyaya seba azadîya Rayberê PKKyî Abdullah Ocalanî amebi destpêkerdene de, formayê ke fotografê Abdullah Ocalanî ser de bi vila kerdib û coka ‘propagandayê rêxistine’ ra rastê 10 serrî ceza ameyî. La Dadgeha Destura Bingeyîn (DDB) qerar da ke na ceza binpêkerdene azadîya fikrî yo. Avûkat Gulşen Ozbeke qerarê DDByî ser o şîrove kerd.

	 

	'Qerar de azadîya fikrî yena destgirewtene'

	 

	Gulşene da zanayîş ke qerarê ko DDByî dayo esas de serê nê de vindenê û wina vat: "DDByî îfade kerdo ke rewşêka ke psin dano û şîdetî teşwîq keno çin o. Birêz Ocalan deshezaran tepîşnayeyêko Tirkîya yo. La heqanê xo ra feyde nêgîno. Heq û û azadîya ci nîno naskerdene. Qanûn de semedê kesê hepsî heqê înan yenê rêzkerdene. La nê heqî Îmralî de nînê bicaardene. Nê heqî ameyê vindarnayene. Mercîyê hukmî, cayêko ke Birêz Ocalanî raste rast krîmînalîze keno vindeno."

	 

	Gulşene da zanayîş ke, waştişê wedaritene tecrîdê serê Abdullah Ocalanî, waştişê azadîya seba Abdullah Ocalan û girewtişê fotografî sûc nîyo û yê ke nê anê ziwan zî vengdayîşêko şîdetî nêkenê.

	 

	'Ganî tecrîd bêro wedaritene' 

	 

	Gulşene bale ante serê qerarê DDByî û vat, qerar de derheqê wedaritişê tecrîdî yan zî sererastkerdene şert û mercê Abdullah Ocalanî de ercnayîşêko çin o û vat: "La ma bi nê qerarî netîceyan vejenê. Yê ke waştişê wedartişê tecrîdî kenê, waştişêko meşrû an ziwan. Hukmkerdene û cigêrayîşê nê kesan nêeşkeno bêro qebulkerdene. Qerarê DDBî seba na babete nimûne ya. Ganî şert û mercê tecrîdo giran zî wedarîyê."