Meclîsê Cinîyan: Ganî tu cinî xo tena hîs nêkerê 

2020-02-07 13:20:31


	 

	STENBOL - Meclîsê Cinîyan do bi şîarê ‘ma do kiştişê cinîyan vindarnê' 9ê Sibate de Beşîktaşî de bêrê têhet.

	 

	Meclîsê Cinîyan 9ê Sibate de Beşîktaşî, Merkezê Kulturê Mustafa Kemalî saete 13.00ine de do bêrê têhet. Xeylêk bajaran de do cinî beşdar bibê û eynî wextî de Stenbolî 16 nokteyê cîya do serwîs wirzê. Sekretera Pêroyî ya Platformê Ma do Kiştişê Cinîyan Vindarnê  Fîdan Ataselîme derheqê babete de qisey kerd.

	 

	Fîdane da zanayîş ke her çar hetê Tirkîya de cinî Stenbolî de bêrê têhet û vat pêro şaristanan de wesayît amade kerdê û vat, xeylêk nokteyê Stenbolî de zî otobus wirzê û vat: "Ma hewl da ma pêro xebatê xo temam bikerê. Ma hema zî vengdayîşê xo dewam kenê. Seba vengdayîşê ma bireso her ca ma hewl danê. Coka her cinî xo sey berpirsîyar bivînê."

	 

	'Gerek ma vindernayîşê kiştişê cinîyan qisey bikerê'

	 

	Fîdane eynî wextî de da zanayîş ke têkoşîno ke bi serran o yeno meşnayene zaf girîng o û vat: "Ma hedef kenê ke pêro cinîyan dir bêrê têhet. 9ê Sibate de do xeylêk cinîyê ke yewbînan nas nêkerdê, raya ewil yewbînan bivînê. Ma bêrê têhet fikrê xo bikerê yew. Ma serê vernîgirewtişê kiştişê cinîyan ser o munaqaşa bierê. Nê het ra Meclîsê Cinîyan ê Tirkîya, meclîsê pêro cinîyan o."

	 

	'Ma zî nê bajaran de ciwîyenê' 

	 

	Fîdane da zanayîş ke do derheqê xeylêk babetan de xebatan bimeşnê û vat: "Ma do serê pêameyîşê Stenbol û qanûnê hûmara 6284 de qisey bikerê. Xalê ke ma rexne kenê, do ser o munaqaşa bêrê kerdene. Ma do serê rêxistinbîyayîşê 81 şaristanan qisey bikerê. Ma do meclîsê cinîyê unîversîteyan, cinîyê ciwan yê unîversîte ser o qisey bikerê. Tena cinî ney, do keyeyê cinîyan ke ameyê qetilkerdene zî a roje  uca de bê. Do kampusê lîseyan, a roje uca de bê. Ma do fikr û şîroveyan bigîrê. Ma do 9ê sibate de Merkezê Kultur Mustafa Kemalî saete  13.00ine de amade bî. Ma pêro cinîyan pawenê."