Multecîye Z.S: Xeylêk cinî kerdî mîyanê fuhuşî 

2020-02-05 09:32:31


	 

	
		Hîkmet Tunç
	
		 
	
		WAN - Z.S ya ke semedê rejîmê Îranî rema û amî Wan wina vat: “Cayo ke ez xebityena, wayîrê kargerî ez tacîz kerd a. Tîya bi desan cinî nas kena, semedê bêîmkanîyê ekonomî kewtî mîyanê fuhuşî."
	
		 
	
		Semedê tedayê rejîmê Îranî, cinîyê multecîyê ke ameyê Tirkîya, tîya zî rastê caardişê nêbaş yenê û fuhuş înan rê yeno ferzkerdene. Yan zî bi mêrdeyê zewicnayeyan dir bi marayê dînî zewicyenê û dima ra benê wayîrê domanan. Cinîyan zor û zehmetîyê ke ciwîyenê qalî kerdî.
	
		 
	
		Z.S.ya ka 4 serrî verê semedê tedayan Îran ra ameye Wan, wina vat: "Pereyê mi çinbi. La cayêko de mi dest bi kar kerd. Wayîrê kargerî ez tacîz kerda. Semedê rewşa multecîbîyayene pereyêko kêm dayne. Seba ke ez vera ci vejîyaya, ey mi kar ra vet."
	
		 
	
		‘Bi desan cinîyê ke kewenê mîyanê fuhuşî estê'
	
		 
	
		Z.S wina dewam kerde: "Bi desan cinîyê sey mi estê. Babeta ziwan, terzê ciwîyayîşî û xeylêk çîyê bîn de probleman ciwîyenê. Bi taybet zî hetê ekonomî de probleman ciwîyenê. Xeylêk cinî seba ke nêeşkenê debara xo bikerê, fuhuş kenê. Cinîyê ke kulubê şewe de xebityenê estê. Şert û mercê ke ci de yê verbî fuhuşî rê benê."
	
		 
	
		'Camêrdo ke ez bi maraya dînî ey dir zeweciyaya, zewicnaye vejîya'
	
		 
	
		Z.S vat, dimayê ke kar ra vejêna, camêrdo bi nameyê S.A nas kena û wina vat: "Bi meraya dînî ma serrêke û nîm ma pîya ciwîyayî. Ez digane menda. Dimayê ke digane menda, sozê xeylêk çîyan da. Mi zî ey ra bawer kerd. Dima ra mi eşnawit ke, zewicnaye yo. La êdî her çi derbaz bibi. Dima ra ma yewbînan ra visyayî. Ez şîya verê keyeyê ey. La înan ez sûcdar kerda. Vatî ti bi camêrdêko zewicnaye dir bîya. La S.A nêvatib ez zewicnayeya. Ez bi diganî tena menda. Pere çinbi. Mi cîranan rê cil û belgî derznayî. Her ke pîzeyê mi pîl bi, ez nêeşkaya bixebityê zî."
	
		 
	
		 'Wazena nasnameyê domanê mi bibo'
	
		 
	
		Z.S da zanayene ke bi piştdayîşî domanê xo rê cilan girewtê û wina dewam kerde: "Dimayê ke doman ame dinya, S.A reyna mi tacîz kerd. Mi vat hetê ekonomî de piştdayîş bide domanî. Ey zî her wext pêşnîyarîyê bêehlaqî kerd. Mi dewaya pîyîtî akerd. Ez wazena nasnameyê domanê mi bibo. Gerek cinî wayîrê hişmendî bibê. Gerek nêkewê dafike cammêrdan. Xeylêk camêrdî, cinîyan sey hacetê cinsî vînenê."
	
		 
	
		'Mêrdeyê mi fuhuş mi rê ferz kerd, la ameya sûcdarkerdene'
	
		 
	
		Cinîya bi nameyê Ş.N zî dîyar keerde ke Îran de hetê mêrdeyo ke ey dir zewicnaye bîya, rastê şîdetê sîstematîk ameya û vat: “Hîrê domanê mi estbî. Mêrdeyê mi verê şîdetê sîstematîk, fuhuş zî mi rê ferz kerd. Mi nê ser o gerre kerd. Rejîmê Îranî xeylêk bi şîdet o. Cinî di rey rastê şîdetî yenê. Mêrdeyê mi dest û lingê mi girê da û rastê tecawizê camêrdêko bîn ameya. Mi gerre kerd, la mi ra vatî 'şahid bîya.' Seba ke şahid zî çinbi, dimayê serbest veradayî, ez sûcdar ameya vînayene û domananê mi dayî pîyê înan."
	
		 
	
		'Ez bi domananê xo dir ameya Wan'
	
		 
	
		Ş.N dewamê qiseykerdişê xo de da zanayîş ke, dimayê ke sûcdar ameya vînayene, domananê xo zî girewta verê xo û vat: "4 serrî verê mi domanê xo girewtî û ameya Wan. Wan de mi H.O nas kerd û ez ey ra digane menda. Mi nêzanayne ke zewicnaye yo. Dimayê ke vîna ez digane ya, terk kerd. Ez nika bi 4 domanan dir têkoşînê cu dana. Multecî cîya yeê vînayene. Camêrdî vînenê ke ma mexdur ê û hewl danê ke feyde ma ra bigîrê. Rewşa cinî û multecîyan rastî zî zehmet a."